Hubag sa damgo

Dear Professor Tata Swami,

Nalipay kaayo ko’g dako nga nabalik na sad ka og pagpanghubad og mga damgo. Sa panahon pa sa imong papa ang among tibuok banay nga mag-atang gyud kanunay. Nang-ingon nako sa akong mga kabanay nga tua sa lagyong dapit nga nabalik na ka, sama sa mga taga Negros ug Bohol.

Prof, nagdamgo man ko nga ang akong bana nagduwa man og bitin nga plastic, kana bang duwaan nga bitin-bitin pero mura gyud og tinuod. Nakakita man gud siya og iring nga ni agi sa among tungod nga nagtan-aw ug t.v. maong nagkuha siya atong bitin nga plastic aron iyang hadlokon ang maong iring. Nikaratil og dagan ang iring Prof. ug pwerteng katawaa sa akong bana pero wa kabantay ang akong bana nga nikalit man og lihok ang bitin ug nahimong tinuod, dili na duwaan. Ni saka kuno ko sa among table nga kan-anan sa akong kahadlok. Mao ra to prof.

Manghinaot ko nga imo ning matubag kay dili gyud ko mahimutang Prof. ay! Salamat ug more power nimo ug sa Banat News!

Ang imong suki. Angel

Angel,

Mangutana ko, mabdos ba ka? Kay kung mabdos man gani ka, imong damgo nagpasabot nga imo gyud nga ampingan ang imong gisabak karon kay kuyaw kaayo nga mangita og lain ang imong mister… Kung wa man gani ka kahibaw kung mabdos ba ka or dili, pagpa check-up dayon aron imong ma-ampingan gyud ang imong pagsabak.

Pastilan pud ni imong bana uy, luoran man! Basin naghinam hinam gyud ni siya sa inyong umaabot nga anak ba, maong mahugno gyud iyang kalibutan kung makuhaan ka ok?

Salamat sa imong tibuok banay nga nagsunod kanunay sa pagpanghubad sa damgo, sukad pa sa among amahan, si Amading Abad. Kung pagbuot sa Ginoo, magpabilin gyud ni atong pagpanghubad aron ta makahatag og pasidaan labi na sa mga dili maayong umaabot nga panghitabo. — Prof. Tata Swami

Atangi ang Hubad sa Damgo matag Miyerkules ug Sabado dinhi lamang sa Banat News. Alang sa inyong pangutana kabahin sa kahulogan sa inyong damgo, ipadala  lang kana ni Tata pinaagi sa: [email protected].