Mogula matag Biyernes Kuwarta ray giapas

Ang bupete ni Atty. Daddy Aluban naa ra sa compound ni Mr. Armand Sukmal sa barangay Calamba. Sa luyo sa bupete, dunay  unom ka doors nga apartment nga gipaabangan ni Mr. Sukmal. Puno ang unom ka doors. Office hours ra si Danny sa iyang opisina. Gikan sa alas 8 sa buntag ngadto sa alas 4 sa hapon. Mopauli siya sa Guadalajara kada hapon. Lima ka tuig na siyang nag-abang sa opisina.

“Attorney! Tagpila ang page sa imong notaryo?’ sa babaye nga nikalit lang og sulod sa bupete usa ka buntag. Napakgang ang pagbasa ni Danny og SCRA (libro nga dunay mga hukom sa Supreme Court). Niyahat si Danny ug nakita niya ang mistesahong babaye nga nagbarog tungod sa pultahan. (Abli man pirmi iyang pultahan ug mga bintana kay dili aircon iyang opisina). Nakamatikod si Danny nga nagpuyo ning bayhana sa usa sa mga apartments. Apan wa gyud sila na-introduced. Gadahum lang ang babaye nga kaila na niya ang abogado.

Nakalitan ug naglibog si Danny sa pangutana. Sa usa ka page sa iyang Notarial Register (Libro diin i-record ang mga dokumentong nanotaryohan) lima ka dokumento ang malista. “Daghan ba kahang dokumento iyang panotaryohan?” sa hunahuna ni Danny. Apan per document man iyang pag-charge og notarial fee. Di man per page. “Depende sa dokumento maoy tubag ni Danny. “Kana mang dunay pula nga ribbon” sa babaye. Nagpadayong nagtindog sa may pultahan. Wa sab ganahing mopadayon ug mopalingkod si Danny. Kay presko og approach ang babaye.

Ang dokumentong may ribbon nga pula, gikan na sa abroad. Kadaghanan gikan sa Amerika. Unya notaryado na sa Philippine Consulate Office. “Ay, kun may ribbon nga pula, di na na angay notaryohan” ni Danny. “Ah sigi. Ako sang susihon ang mga dokumento sa akong anak” niya pa dayong gawas.

Nipadayon si Danny sa iyang gibasa. Wa siyay bista rong adlawa ug nag-research lang siya sa usa ka kaso. Wa siyay sekretarya. Solo flight siya ining iyang opisina. Iyang kaskas, iyang sayaw.

Pagkataudtaod, nibalik ang babaye. Nagdala nag mga dokumento. “Pilay bayad sa certified true copy?” sa babaye human gipakita sa abogado ang mga Xerox sa mga dokumento. Transcript of records sa iyang anak. “Sorry misis. Dili otorisado ang abogado pag-certify og dokumento nga wala sa iyang posisyon. Ang maka-certify ana, ang nagkopya o ang opisina diin nakuha ang dokumento” ni Danny. “Notaryo publiko man kaha ka?” sa babaye. Nadismayo ang nawong. “O, pero way labot sa trabaho sa notaryo publiko ang pag-certify og dokumento. Kun ako ang naghupot sa dokumento, pananglitan mga papeles sa kaso  o notaryado na nako nga dokumento, puwede ko mo-certify” ni Danny. Nibiya ang babaye nga nagmug-ot.

Basta ang tawo magpa-bright-bright, tag-anon daan ang trabaho sa abogado, madismayo lang siya. Ang angay unta niyang buhaton, mangutana una siya sa angay  niyang masayran. Dili kay pilay bayad. Nagtoo siyang kuwarta ra gyuy giapas sa abogado. Si Danny motrabaho sa husto. Ug maningil sab sa husto. Dili kay maningil lang siya’g kuwarta sa dili hustong trabaho. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag.)