Bread winner

Dear Tita Salie,

Have a nice day. I am an avid reader of your column ug ganahan kaayo ko mobasa sa imong mga advice. Mao nga nanghinaot pod ko nga imo kong tabangan niining akong problema karon. Naglibog na man god ko kun unsay akong buhaton.

Tagoa lang ko sa pangalan nga Jen, 19 years of age na, Tita, ug usa ka dalaga. Kining akong problema dunay kalabotan sa gugma ug partly usab sa akong sitwasyon karon.

Wala na koy mga ginikanan ug nia ko karon nagpuyo sa akong lola. Naningkamot na lang gyod ko og akoa, Tita, aron dili mi maglisod sa akong lola. Ako man god ang bread winner karon ug ako ang nagbuhi sa akong lola.

Kining akong boyfriend nga pareho lang nako og pangidaron 19, gusto na makigminyo kanako. Bag-ohay pa man unta ang among relasyon kay 3 months pa lang kami. Pero pursigido na kaayo siyang makigminyo kanako.

Og naglibog ko, Tita, tungod kay bread winner ko ug mag-unsa na man lang unya ang akong lola kun magminyo ko. Kinsa na man lang ang motabang kanila. Pero love nako ang akong boyfriend. Unsa may angay nakong buhaton, Tita? Palihog pasabta ko. Thank you kaayo. God bless.

* * *

Dearest Jen,

Yes, sayo pa gyud kaayo kun imo nang sudlan ang kaminyoon. Dili lang kay bread winner ka apan dili pa karon ang hustong higayon nga mamahimo kang asawa.

Ingna lang ang imong hinigugma nga dili pa ka ready sa maong kinabuhi kay una ikaw pa ang gisaligan sa imong lola, ug gawas pa niini bisan pa man kun moingon siya nga inyong buhion ang imong lola apan nasayod ko nga sayo ra gyod kanimo kun magminyo na ka.

Mas maayo pa seguro kun imong ingnon ang imong boyfriend nga inyo unang andamon ug planohon pag-ayo ang inyong  kaminyoon ug dili kini dali-dalion. Ang una ninyong  buhaton mao nga mangita una mo og nindot nga trabaho ug kon duna na moy trabaho, mag open mo og savings account aron duna moy pundo.

Kining inyong pundo o savings dinhi ninyo kuhaon ang igasto unya sa inyong kasal, ug ang uban niini maoy inyong pundo kun duna na moy pamilya. Kay abi god ninyo mao kini ang kasagaran nga problema sa magtiayon kay sa ilang kaminyoon wala gyod sila’y kwarta nga ilang madali og kuha kun ugaling dunay panginahanglan. Mao nga kun  dunay problema sa kwarta magkapuliki intawon og pangita’g kautangan. -- Tita Salie