Maria Magdalena - Gula 23

Tingpanihapon na sa dihang migawas ko sa akong kuwarto. Nagsige lang ko og hunahuna sa mamahimo nakong kinabuhi didto sa Cebu City. Nahunahuna ko usab ang kamingaw nga magkalagyo na kami si Elizar.

Migawas ko sa kuwarto ug mitambong sa panihapon kauban ang akong mga ginikanan ug ang igsuon kong lalaki. Samtang nangaon, nagkabildohay ming tanan. Bahin sa akong paglarga ngadto sa Cebu ang among gipanagsultihan.

Human sa panihapon, misulod ko sa akong kuwarto aron matulog og sayo. Mangadlawon ra ba ko’g sakay og bus paingon sa siyudad aron sayo ko mahuman sa pagpa-enroll kay mangita pa ra ba ko’g balay nga kapuy-an. Mao nga gusto kong makatulog og sayo.

Dihang mihigda na ko sa kama, dunay mi-text sa akong selpon. Si Elizar diay kini ug maoy iyang gusto nga magkita mi tungod kay palargahon usab siya paingon sa Dumaguete nianang pagka-ugma. Ug adto siya paagion sa Santander. Ug hayan dugay pa kaming magkita pag-usab.

“Ablihi na lang ang imong bentana kay mokatkat ko,” maoy sunod niyang text.

Wala ko motubag. Apan dili pa lang dugay sa iyang pag-text, may nabati kong hagawhaw sa kilid sa akong kuwarto, kay nadaplin man ang akong kuwarto sa silong sa among balay.

“Maria, ablihi ang bentana,” hagawhaw nga tingog ni Elizar.-- Sumpayan pa