Bugti sa gugmang tiunay

Nahalisuliso na lang si Ronald sa iyang higdaanan, apan wala gayud siya abta og katulogon. Nagsigi man god siya’g hunahuna sa gisulti kaniya ni Atty. Ledor, sa dihang nagkaabot sila didto sa may Aquino Park. Nga anaa mahimutang haduol sa munisipyo.

Morag nanagingting pa gyud sa iyang mga dunggan nga gipamulong ni Atty. Ledor nga nagkanayon, “kun tinuod kang nahigugma sa akong anak, ayaw na pagpadayon sa imong tinguha sa paglansar pagka mayor batok kanako! Kay kun magtuman ka gani gayud sa imong gusto, pabuwagan ko gayud ikaw, kang Manilyn!”

Daw nakalitan kaayo si Ronald sa gipamulong ni Atty. Ledor. Wala gayud siya magtuo nga makasulti si Atty. Ledor niadto. Nga ibugti niini, ang iyang tinguha pagka mayor, ngadto sa ilang relasyon ni Manilyn. Ang babaye nga maoy giisip niyang una ug katapusang gugma, kay mao ra man kini ang bugtong babaye nga nakapapitik sa iyang kasingkasing.  Ug gipangandoy niyang mahimong kapikas sa iyang kinabuhi. Gani, ang panahon na lang maoy iyang giagad.

Alang kang Ronald, ang gibuhat ni Atty. Ledor maoy usa ka dakung hagit, ug pagsukod sa iyang pagkatawo. Aron gayud maila kun unsa ug si kinsa gayud siya. Dili man god masayon ang ipabuhat kaniya ni Atty. Ledor. Ug nagkinahanglan gayud kini’g husto ug maayong paghukom. Hinuon, anaa ra kang Ronald ang paghukom. Kun hain gayud sa duha ang iyang palabihon. Ang iya bang gugma ngadto kang Manilyn ug ang iya bang pangandoy nga mahimong mayor. Aron siya makaalagad sa iyang mga katagilungsod nga mao  gyud ang nag-agni kaniya, sa paglansar pagka mayor.

Daghan man god ang mga tawo sa ilang dapit, ang nakagusto kang Ronald nga maoy mahimong mayor sa ilang dapit. Dako man god kaayo sila’g pagsalig kang Ronald. Kay gawas nga aktibo kaayo kini sa bisan unsa nga mga kalihukan, maayo sab kaayo kining tawo. Ug maantigo gyud nga makigdait ni bisan kinsa.

Nagbuntag gayud nga walay tulog si Ronald, tungod sa pagsigi niya’g hunahuna sa gisulti kaniya ni Atty. Ledor. Gihunahuna gyud niya pag-ayo, ang angay niyang buhaton. Nahitaya man god ning higayona ang iyang gugma ngadto kang Manilyn. Ug ang gugma niya sa iyang  mga katagilungsod. Nga mao gayud ang nagtukmod kaniya, sa paglansar pagka mayor batok kang Atty. Ledor, nga maoy amahan ni Manilyn.

“Unsa tuod Ronald, mosibog ka sa imong kandidatura pagka mayor?” Gipangutana si Ronald sa usa sa iyang mga lider, sa dihang nagkita sila diha sa may merkado.

“Kinsa god nga nagsulti nimo niana” misumbalik sa pagpangutana  si Ronald.

“Daghan nako og nabatian. Mao ka nay mikatap nga sugilanon karon, dinhi sa ato,” mitubag ang kaestorya ni Ronald. Nga mora’g nahingawa pag-ayo.

“Oy, aron gyud mo masayud, hingpit na ang akong hukom. Ug maliso pay buko sa kawayan. Bahala na, og unsay dangatan!” Daling tubag ni Ronald sa dakung kamatinud-anon. (Kataposan)