Baklag

Nagkaguliyang ang mga pupils sa grade one, ning kasayo pa sa kabuntagon. Aduna man goy pipila ka buok gipanguyapan, gumikan sa talagsaong baho nga ilang nasingo sulod sa ilang classroom, diin si Miss Porlaysa Bacani, ang magtutudlo.

“May I have your attention please!” misinggaak sa tumang kalanog ang tingog ni Mister Bartolo Gadores, ang principal sa maong tulunghaan sa Kampawog Elementary School.

“Relax and be calm ... sa inyong napanimahoan!”

Dili na tiaw ang kakulba nga gibati niadtong tungora ni Miss Porlaysa Bacani. Nagduda na gayod siya nga ang baklag nga napanimahoan sa iyang mga tinun-an, nagagikan sa iyang bilahan.

“Dili madala og relax Sir, makamatay kining bahoa?” misinggit kadtong usa ka tinun-an ni Miss Porlaysa Bacani nga kakuyapon.

Nahibug-ok na sa pagpanggisod ang kabugnaw sa tangkugo ni Miss Porlaysa Bacani. Naingon lang god siya niini gumikan sa kalayo sa dapit sa atabay nga iyang kakaligoan? Tangkod pa lang gud ang duha ka semana siya nahiabot ning dapita, diin siya ang napilian sa ilang district supervisor aron patudloon sa Grade one. Hilabihan man gud kataas sa iyang rating nga nakuha sa Civil Service Teacher’s Examination. “Based upon the result sa imong nakuha sa Civil Service Teacher’s Examination, temporarily adto ko ikaw idistino mintras tanto sa tulunghaan sa bukiran sa Kampawog Elementary School!” mao kini ang kanunay nga mopasunding sa hunahuna ni Miss Porlaysa Bacani.

Dili matali sa tudlo ni Miss Porlaysa Bacani, nganong iya dayon nga gidawat ang gitanyag sa ilang district supervisor, nga unta siya usa na man ka eligible ug pasado sa pasulit sa pagka-maestra?

Karon unsay resulta sa iyang pagka-madalidalion? Usa na gud siya ka semana nga wa makaligo? Mangalisbo na sa iyang bilahan ang baho pa sa patay nga ilaga.

“Mam ... excuse me for a while ... ngano man kaha nga atubangan sa imong bilahan ... daghan mang lagong nga midugok?” nakapangutana kaniya si Mr. Bartolo Gadores.

Nakahunahuna og diskarte nga pamaagi si Miss Porlaysa Bacani, aron dili siya kutikutihon pa og sukot sa ilang principal, diin siya nagkanayon:

“Gisudlan ko ni ang akong bulsa og patay’ng ilaga aron dili manuol ang mga dagkong lamok nga maoy hinungdan sa sakit sa dengue!”

Timprano nga nahiuli si Miss Porlaysa Bacani  sa balay nga iyang giabangan. Nanglurat ang iyang mata kay mialibwag man ang langaw. (Kataposan)