Si lolo pahong

“La, si lolo, Pahong!” singgit ni Dong Kadong, 10 anyos. Mao gyuy paghimuntog ni lola Gwerta sa pultahan sa ilang ba’y dihang iyang nasugatan ang apo nga pwerteng dagana nga miguwa sa ilang pultahan. Gikan siyang nangumpra sa Argao Market.

“Giunsa nimo atong apo, Norting? Nga pwerte man adtong lisanga nga nagdagan,” matud ni lola Gwerta nga nagbaguod pa sa 2 ka basket niyang kinumpra nga ang mga sud kay 1/4 kilong manok, 1/4 baboy, 1/4 isda, 1/4 baka, 1/4 kanding, utanon, lamas ug uban pa. Alang sa ilang usa ka semana nga kunsomo aron makamenos sa plite ug makapadayon sa ilang trabaho nga panug-ot kay layo ra ba sila sa lungsod. Mga 10 kilometros.

“A, hapsan ko unta tong bataa sa ikog pagi, ba,” ni Lolo Norting nga nanglisik ang mga mata. Isog ug kusog kaayog tingog. Mora lagi’g gituboag sungay ug ikog.

“A, ikog sa pagi gyud!” nakalitan si lola Gwerta sa nadungog. Sa iya pang hunahuna ang iya man ganing bana ang angayang latuson sa ikog sa pagi kay demonyo kaayo’g nawong kay tapulang dako. Gamay’ng trabaho dako’g kaon. Pareha silang 60 anyos.

“Unsa man diay sala sa atong apo, Norting nga pwerti man nimong sukoa?” ni Lola Gwerta nga misud sa balay ug gipahimutang iyang mga kinumpra sa lamesa.

“Kinsa may di masuko ana nga ako siyang giingnan nga kantahi ko Dong, kay matulog ko...”

“Wa diay ka kantahi nga mokanta man na siya dayon,” sakgaw ni lola Gwerta. “Gikantahan man,” ni lolo Norting.

“Gikantahan man kaha ka nganong nasuko ka man?” ni lola Gwerta.

“Ikaw bay kantahag ‘Pahulay sa dayon’ di ka masuko!” ni Lolo Norting uban ang pagbunal sa ikog sa pagi sa ilang bungbong nga amakan. Laksi gud. (Katapusan)