Kainit sa Gugma Gula 7

Wala sila magdugay sa birthday party sa balay sa Tiyo ni Fem sa Consolacion. Nagkuyog sila pagpamauli sa ginikanan sa dalaga. Kadto maoy sinugdanan nga nasuod ni Rey ang mga ginikanan sa iyang girlfriend.

Wala malilong sa mga ginikanan ni Fe Marie ang relasyon nila ni Rey. “Hangyo lang namo nimo Rey, ayaw tawon binuangi si Fem kay bugtong namo siya nga anak ug ikaguol kaayo namo kun may dili maayo nga mahitabo kaniya,” matud sa amahan ni Fem.

Gisaaran ni Rey ang mga ginikanan ni Fem nga dili siya magbinuang sa ilang anak. Kadto maoy nakapasuod pa kaayo nila ni Fem ug Rey. Baliwala na lang sa mga ginikanan ni Fe Marie kun dugay nga mauli ang ilang anak gikan nga manuroy.

Dunay mga higayon nga mag-inusara lang si Fem sa ilang balay atul sa bakasyon kay pulos man nagtrabaho ang iyang mga ginikanan ug hapon pa kini mauli. Daw sama sila sa bag-ong minyo nga magdungan og pangaon, dayon magparayganay.

Miabot ang panahon nga sa ilang pagparayganay daw dili na makapugong si Rey sa iyang gibati. Ingon usab diay niini ang gibati ni Fe Marie nga nadutlan gayud sa grabeng mga parayeg kaniya sa iyang boyfriend.

Dunay gihunghong si Rey kang Fem. “Dili ko uy, momabdos pa lang ko kasab-an g’yud ko nila ni Papa ug Mama,” pwerteng nakapamalibad ni Fe Marie apan wala usab maluba si Rey sa iyang paghangyo sa dalaga.

“Ayaw na kahadlok Fem kay misaad na gani ko sa imong ginikanan nga dili ko ikaw talikdan. Ikaw ang akong pakaslan,” pwerteng nakapangamoral ni Rey kang Fem.

Wala tuod mosipyat si Rey kay nalukmay ang dalaga sa mga matam-is niya nga pasalig. “Dali, sunod nako sa akong kwarto,” paraygon kaayo ang tingog ni Fem.

Gisaw-an nila ni Fem ug Rey ang katam-is sa gugma taliwala sa ilang pagparayganay. “Hinay lang gud, hot kaayo ka uy,” hagawhaw apan paraygon  nga tingog ni Fem ngadto sa iyang boyfriend.

Human sa makabuhong nila nga kumbati. Namalik sila didto sa sala ug nagtupad sa pagpanglingkod, apan padayon nga nagparayganay. “Pwede na man tingali ta magminyo kay 19 na man ko Fem. Sugot ka ba?”

Mingisi si Fe Marie. “Sugot na lang kay basin og matintal ka pa’s lain.’ Nagkataw-anay ang maghigugmaay. Alang kanila tam-is kaayo ang gugma taliwala sa kainit sa tagsa-tagsa nila ka mga pagbati.

“Ang kainit sa akong pagmahal nimo Fem, sama gayud sa kainit adtong mitan-aw ko sa Siete Palabras nga imo ko nga gipayongan,” ni Rey pa nga nagngisi. (Kataposan)