Ang husto nga paagi sa pagtuon sa Bibliya

Daghan nang mga Bible Schools o Bible Colleges sa tibuok kalibutan karon. Apan ang mga tawo, wa magkahiusa sa usa lang ka relihiyon. Usa ra man unta ang Diyos sumala sa mga Kristiyanos. Tataw nga mismo ang mga giilang eksperto sa Bibliya, dili tinuod nga eksperto. Kay wa man sila magkasabot sa usa lang ka Biblical Truth.

Ang pinakauna gyung butang nga angay sutaon sa tawo sa di pa mobasa og Bibliya, ang iyang kasingkasing. Kun unsay tumong ug tinguha niya nga mobasa o motuon man siya og Bibliya. Kinahanglang maayo gyud iyang tumong. Dili selfish ambition. Ang pinakanindot nga tumong mao ang pagkat-on sa kamatuoran. Ug ang maong kamatuoran, gamiton sa pagpalambo sa gugma sa Diyos, gugma sa iyang mga pulong ug gugma sa isig ka tawo.

Kinahanglang bahigon ang mga pulong sa Bibliya. Una, literal nga panabot ang pinakabililhon. Kun masabot sa literal ang usa ka bersekulo, mao nay pinakahusto ug pinakamaayo nga panabot. The Bible should mean what it says. Ang poetic o balaknon ug idiomatic o pasumbingay, dapat katapusan o pinakaulahi lang na pagsabot. Kana kun di masabot ang mensahe pinaagi sa literal nga hubad. Kay kanang mga poetic o idiomatic expressions, mao nay maghatag lisensiya sa mga konuhay Bible expert, sa paglubag sa kamatuoran pabor sa ilang mga selfish ambitions.

Ang unod sa Bibliya, from Genesis to Revelation, dili na tanan pulong sa Diyos. Duna gani pulong sa mga mananap ug mga tanom. Una, pinakadaghan ang mga pulong sa tagsulat o storyteller. Ika-duha, may mga pulong sa Diyos Amahan ug mga pulong ni Jesukristo. Ika-tulo, may mga pulong ni Satanas ug sa mga demonyo. May mga pulong sa mga apostoles, propeta, mga hari, pari, sundalo ug ordinaryong mga tawo. Nagkalainlain ang mga karakters sa mga estorya sa Bibliya. Ug duna sila’y mga dialogue. Busa, ang mga pulong nga naa sa Bibliya, dili tanan sa Diyos. Kun ilhon nimo nga ang Bibliya pulong sa Diyos, sayop ka na daan. Ang insakto nga  panabot, mao nga ang pulong sa Diyos naa sa Bibliya. Pero ang Bibliya, dili tanan pulong sa Diyos.

Daghan sang mga bakak nga pulong sa tawo sa Bibliya. Naay uban nanagana lang, pero sayop nga panagna o bakak. Kay wa lang sila nasayod sa tinuod.

Kada-sentence nga nahisulat sa Bibliya, imong sabton una sa tanan kun kinsa ang namulong. Dayon, kinsay iyang gisultihan. Diin ug kanus-a siya nagsulti niini. Unsay kahimtang adtong panahona, sa pagsulti. Kay sa ingon, masabtan nimo ang gipamulong. Kun nideklarar ba lang ang tawo sa usa ka kamatuoran, doktrina, banabana, panagna, balak, awit, proverb, pag-ampo o panahom.

Nganong nagyagaw man ang panabot sa tawo sa Bibliya? Tungod kay wa niya bahiga ang mga pulong iyang nabasahan. Ang mga pulong sa Diyos amahan ug ni Jesus, maoy dapat ilhong balaod, prinsipyo o doktrina. Ang mga pulong sa mga propeta ug apostoles, mga panahom lang nga dapat dili mosukwahi sa pulong sa Diyos ug ni Jesus.

Bantayi si Father, Pastor, Minister, Elder or Brother nga magsangyaw. Di ba mga pulong nila ni Pablo, Pedro, Juan, Santiago, ug uban pang apostoles, ang gipangsitar? Gikalimtan ug gitaligam-an ang mga pulong ni Jesus ug sa Diyos amahan. Ngano kaha?  Kay lisod man o para sa kadaghanan, imposible puy-an ang pagtulon-an ni Jesus. Kinsa may mobalos og pan sa bato? Kinsa may motaon sa ikaduhang aping sa pagpasagpa? Kinsa may mahigugma sa iyang kaaway?

Kay matud pa ni Pablo “Wa magkinahanglan og maayong buhat ang tawo aron maluwas” Husto kaha na? Husto na sa mga dautang tawo. Ang pagrespeto sa ginikanan ug katungod sa isig ka tawo, mga maayo ning buhat. Wa na diay ni kinahanglana?

Hain may mas bug-at? Pulong ni Jesus? O Pulong ni Pablo? Daghang mangingilad karong panahona nga nagsipit-sipit og Bibliya.