Bangaw

Buntag. Pagtuang sa habuhabong ulan, naglumba sa pagpanggawas sa ilang panimalay ang upat ka kabataan ug didto mopaingon sa nabakanteng luna, nga maoy sagad nilang duladulaan sa matag adlaw’ng Sabado ug Domingo nga walay klase ang elementaryang publikong eskuylahan sa ilang baryo.

Nakasinggit sa kalipay sila si Estoy, Meloy, Rael ug Buboy nga naglantaw sa bangaw nga milakra sa aping sa langit.

“Katahom sa bangaw, uy...!” matud ni Estoy nga mitudlo sa bangaw nga kusog kaayo ang pagpirat sa kirat niyang mga mata.

“Bitaw! Way sama kaanindot sa bangaw!” sagbat usab ni Meloy, ang guwapuhong bata sa grupo apan molugwa sa matag karon ug unya ang sip-unon niyang ilong. “Pagkatahom sa teknikulor nga arko sa bangaw!”

“Naay pula, berde, asul, dalag, bayolet, orange, kape ang nagkalidades nga kulor sa bangaw!” ni Rael nga mitudlo sab sa bangaw nga nakapasamot sa lisngag niyang  ilong.

“Morag duol ra ang arko sa bangaw gikan dinhi sa atong gitindogan! Morag anaa ra sa sapa sa unahan...!” singgit sab ni Buboy nga maoy nakapasamot sa budlat niyang kalimutaw. “Tana atong susihon didto sa sapa sa unahan.

Nagkatinan-away ang upat ka batang managkadula, managsilingan ug managklasmyet sa Grade Six sa edad nga dose.

“Tana, susihon ta ang nag-arkong bangaw sa sapa sa unahan...!” mikihat si Estoy nga nagpiratpirat gihapon ang kirat nga mga mata.

“Hala, basin tinuod nga dunay bulawan sa tiilan sa bangaw...!” ni Meloy nga nanikma sa miagas niyang sip-on sa iyang ilong.

“Bitaw, no? Basin matinuod ang nasulat sa libro nga gibasa sa atong Mam, nga adunay bulawan sa kinatumyan sa bangaw! nagkihatkihat si Rael ug naklaro ang kalisngag sa iyang ilong.

“Tana, susihon ta ang sapa sa unahan. Managan ta...!” misenyas si Buboy sa iyang simod ug misamot kasiga ang budlat niyang kalimutaw.

Morag naglumba sa pagdinaganay sila si Estoy, Meloy, Rael ug Buboy paingon sa sapa sa unahan, aron susihon ang tiilan sa bangaw. Apan naminghoy sila sa pag-abot sa sapa.

“Uy, layo naman sab ang arko sa bangaw...!”

“Bitaw! Tua naman sab sa halayong unahan...!”

“Abi man natog ania dinhi sa sapa ang tiilan sa bangaw...!”

“Sus, misapigad naman sa halayong bungtod ang nag-arkong kalidades nga kolor sa bangaw...!”

Igo lang nakapanglingo sila si Estoy, Meloy, Rael ug Buboy nga mitudlo sa matahom nga bangaw. Nangatawa silang tanan nga mihana paggunting sa ilang mga tudlo sa nagkalidades nga mga kolor sa nag-arkong bangaw sa aping sa langit nga daw padayong nagpaibog kanila niadtong buntaga. (Kataposan)