Kainit sa Gugma

Gula 6

Wala makatingog si Fe Marie nga gigunitan ni Reynante ang iyang bukton. Wala makasabot si Fem sa iyang gibati nga gigunitan ni Reynante. Nagkuba-kuba ang iyang dughan apan wala siya mahadlok ngadto sa ulitawo.

Gibuhian ni Rey ang bukton ni Fem ug samtang iyang gitutokan ang dalaga, anam-anam niya nga gigakus si Fe Marie. Misamot ang pagkuba sa dughan ni Fem dihang midapat na sa iyang lawas ang lawas ni Reynante.

Wala makasabot si Fe Marie sa iyang gibati. Bisan og nakabaton na siya kaniadto og boyfriend apan una pa kini nga higayon nga nagpagakus siya og lalaki. Gibai-id ni Fem ang iyang nawong ngadto sa dughan ni Rey.

“Wala pa ko nimo tandoa sa pag-ingon nako kanimo nga I love you,” hagawhaw ni Reynante ngadto kang Fem. Nakita ni Rey nga mauwawon si Fem nga motubag kaniya. “Dili ba miingon ka man kaganina nga action speaks louder than words,” ni Fem.

Naglumpayat sa kalipay ang kasing-kasing ni Rey. Nakasabot dayon siya nga may gusto usab kaniya si Fe Marie apan mauwaw lang motug-an. Walay kaso nga dili ka molitok sa pagka karon, apan nasayud ko nga nahigugma ka ‘sab nako.

Gihagkan dayon ni Rey ang aping sa dalaga samtang padayon niya kini nga gigakus. Gitutokan ni Rey ang dalaga ug nasabot niya nga nauwaw kaayo si Fem. Gisundan ni Rey sa pag-kiss ang lips sa dalaga.

Ingon sa gituboy sa kapanganoran si Rey samtang nag-ukobay ang masi’g nila ka mga ngabil. “Love you Fem,” hagawhaw ni Rey ngadto sa dalaga. “I love you sab Rey,” hinay nga tingog ni Fe Marie. Misamot nga naglumpayat na sa kalipay si Rey nga nakadungog sa maong mga pulong.

Wala nay pugong-pugong ang ilang pagparayganay samtang pareho nga nagbarug diha sa sala. Milingkud sila sa sala apan pagkataud-taud, gipakaligo na usab ni Rey og mga parayeg ang dalaga.

“Salamat kaayo nga gisugot ko nimo Fem,” ni Rey pa nga daw gianud na sa kalalim sa iyang gibati. Giusban pagpatagamtam og mga parayeg ni Reynante ang dalaga. “Ayaw baya ko’g binuangi Rey ha? Mga bata pa baya ta,” matud ni Fem.

Taud-taud nangapas sila sa mga ginikanan ni Fe Marie nga mitambong sa birthday party sa uyoan sa dalaga didto sa Consolacion. “Nadugay man kamo’g apas Fem,” matud sa inahan sa dalaga sa dayon nila nga pagtangka sa balay.

“Puno kanunay ang mga sakyanan Ma,” pasangil sa dalaga kun nganong nadugay sila. - Sumpayan