Maria Magdalena

Gula 18

Nahadlok ko nga iyang makit-an kay tingali unya kun nakita usab si Elizar nga bag-ohay lang migawas. Namahala na lang ko. Segurado ko nga nabalaka na silang papa ug mama kun nganong wala pa ako mahiuli.

Milingi ang maong lalaki ug iya kong nasiplatan. Mipaspas ko paglakaw paingon sa gate sa among school. Paspas kaayo ang kuba sa akong dughan. Wala ra ba ko makaila sa maong lalaki.

Bahala na lang kun nakit-an ming duha ni Elizar nga dugay nga migawas sa school, total, wa man siya kakita kun unsay among gibuhat didto sa sulod.

Paggawas na nako sa gate nakit-an dayon nako si Elizar nga nagbarog dili halayo sa akong nahimutangan. Mora’g naluagan ang akong dughan sa kahadlok. Ug samtang naglakaw ko paingon mopauli gisundab usab ako ni Elizar hangtod nga nagkuyog na mi paglakaw.

“Abi nako’g nipauli ka na,” matud ko.

“Wala, gibantayan tikaw kay sa akong paggawas, ngitngit na kaayo ug ikaw rang usa. Maong gihulat ko na lang tikaw,” ni Elizar pa.

Imbes wala mi magdungan og gawas si Elizar sa eskuylahan aron malikayan ang estorya kun ugaling duna may makakita kanamo. Iya na hinuon kong gihatod sa among balay.

Ug maayo na lang kay ang maong lalaki nga didto nagbarog tungod sa among eskuylahan bag-ohay ra siya ug wala niya makit-i si Elizar nga migawas sa school namo. -- Sumpayan pa