Kainit sa Gugma

Gula 5

Wala magdugay ang ilang paglakaw ni Reynante ug Fe Marie. Didto sila misangko sa usa ka balay nga nahimutang sa kinatumyan sa dalan-dalan. “Mao kini ang among balay Rey, pasensya na gamay lagi tawon,” ingon sa mapaubsanon ang tingog ni Fem.

Talilakaw na diay ang mga ginikanan ni Fe Marie. “Uy maayo kay dia ka na Fem. Tana magkuyog ta kay birthday man diay ni Tiyo Nato nimo sa Consolacion. Pero may bisita ka man diay,” matud sa inahan ni Fem.

Igo lang mitutok ang amahan ni Fe Marie kang Reynante. “Maayong hapon sir, maam,” ubos ang tono sa tingog ni Rey. Igo lang miyango ang amahan ni Fe Marie apan mipahiyom kini samtang mitutok sa ulitawo.

“Kuyog ta Rey, birthday man diay ni Tiyo Nato,” giingnan ni Fem si Rey. “Sigi,” dali kaayo nga nakatangdo si Rey. “Kun mao nga magkuyog man diay mo, mag-una na lang mi si Papa nimo anak. Ayaw lang mo pagdugay,” matud sa inahan sa dalaga.

Misulod sila sa balay. “Mag-ilis lang ko kadiyot Rey kay init kaayo. Ngano gud nga nagsigi ka man og tutok nako uy,” matud ni Fem nga wala makapugong sa pagpahiyom. “Dili man lagi estrikto ang imong mga ginikanan,” ni Rey pa.

Ang tinuod nakabantay si Fe Marie nga ingon sa gaan ang pagtagad sa iyang mga ginikanan kang Rey bisan og karon pa sila magkita. Gibiyaan ni Fem ang iyang bisita sa sala ug misulod usa siya kadiyot sa banyo aron maligo.

Wala danti og dugay, migawas si Fem sa banyo ug nag-ilis sa iyang kwarto. Pagawas ni Fem, midiritso kini sa nahimutangan ni Rey sa sala. Nakapanglad-ok si Rey sa iyang laway pagkakita nga nag-short pants lang si Fem.

Gipaak ni Rey ang ubos niyang ngabil samtang nagtan-aw ni Fe Marie. “Uy...mora ka g’yud og kapaakon tan-awon,” matud ni Fem. “Nakapahiyom si Rey. “Wala ka masayop Fem, makabibihag kaayo ka tan-awon anang imong gisul-ob,” ni Rey pa.

“Pastilan, kun mauyab tika, dili ka g’yud magmahay Fem,” matud ni Rey. Abtik kaayo nga naka-react si Fem. “Unsaon nga wala ka man manguyab?”

Daw nahagit si Reynante. “Matud bitaw sa panultihon Fem nga action speaks louder than words mao nga dili na kinahanglang isulti pa nako nimo ang akong pagbati,” ni Rey pa dungan sa pagunit sa kamot sa dalaga.

Wala makatingog si Fem nga nakadungog nga gitinuod g’yud ni Rey ang pagpanguyab kaniya. Ang tinuod, gikalipay ni Fem nga nanguyab kaniya ang ulitawo. “I love you Fem,” giagbayan ni Rey ang dalaga. - Sumpayan