Kainit sa Gugma - Gula 4

Human nila’g pamalit sa department store, misulod sila si Reynante ug Fe Marie sa usa ka pabugnawan. Miorder sila’g makaon ug tagsa ka baso nga halo-halo. Nasabot ni Reynante nga malipayon si Fe Marie sa ilang panag-uban.

Gusto pa unta ni Reynante nga mag-uban pa sila si Fe Marie apan gusto na sa dalaga nga mopauli. “Dili kaayo ko magdugay Rey kay masuko ang akong mga ginikanan kun magdugay ko pag-uli panahon sa gabii,” pasabot ni Fe Marie.

Nakahukom si Rey nga iyang ihatud si Fem sa ilang balay sa Barangay Carreta aron iya usab nga maila-ila ang mga ginikanan niini nga matud pa masuko kun magabhian pagpauli ang ilang anak.

“Mouban ka sa amo?” nakurat si Fe Marie dihang giingnan siya ni Rey nga ihatud siya sa iyang pagpauli. “Dili ka mosugot? Maayo nga makaila sila nako aron makaila na sila’ng daan sa ilang umagaron,” matud ni Reynante nga nagngisi.

Miiknat ang kilay ni Fe Marie nga nakadungog sa gisulti ni Reynante nga mahimo siya nga umaabot nga umagad sa iyang mga ginikanan. “Nakapanguyab ka na diay nako?” iyang giingnan si Rey sa tingog nga klaro kaayo nga wala masuko.

Nagpahiyom si Rey nga mitutok kang Fe Marie...wala siya motubag og hinoon iyang giagbayan si Fem. “Tana, adto ta mosakay og jeep sa Manalili apan pwede ra ‘sab nga magtaksi ta.”

Dunay nagdanga-danga nga taksi sa ilang gibarugan duol gawas nga bahin sa dakung department store. Gipara dayon ni Rey ang taksi ug gibuksan ang pultahan sa luyo nga bahin.

Una niya nga gipasakay si Fe Marie, dayon mitupad siya paglingkud sa dalaga. Kun adunay makakita daw sama gayud sila sa tinuod nga managhinigugmaay, apan ang tinuod wala pa gani makapanguyab si Rey.

Mora’g naanad na si Rey nga dihang misakay sila’g PUJ sa miaging adlaw iyang gipasandig si Fem sa iyang dughan. Hinay niya nga gigabling si Fe Marie aron mosandig na usab sa iyang dughan samtang nagdagan ang taksi.

Gipaundayonan ra ni Fe Marie si Rey. Misandig siya sa dughan niini ug inanay niya nga nabatyag ang kainit sa dughan sa ulitawo.  Nangalimyon si Fe Marie ngadto kang Reynante tungod sa gigamit niya nga pahumot.

“Kahumot nimo uy, di g’yud tingali pul-an ang mahimo nimo nga boyfriend,” gikomedyahan ni Rey ang dalaga. Wala motubag si Fe Marie apan igo lang nga mipahiyom.

Giingnan ni Fem ang drayber nga ilugar ang taksi atubangan sa DSWD regional office. Nanganaug sila human kabayri ni Rey ang drayber. Misunod si Rey kang Fem nga misubay sa dalan-dalan. - Sumpayan