Kainit sa Gugma

Gula 3

Gidapit ni Reynante si Fe Marie nga mosandig kaniya aron dili kaayo mapiit sa ubang pasahero samtang nagsakay sila sa PUJ.

Gituman ni Fe Marie ang gitambag kaniya ni Reynante. Nabatyag ni Reynante ang kalalim dihang midapat na sa iyang dughan ang buko-buko sa dalaga.

Gibutang ni Reynante ang tuo niya nga kamot sa tuo nga bahin sa lawas ni Fe Marie aron dili kaayo madikit ang dalaga sa iyang katupad nga pasahero.

Ingon sa nagakus na ni Reynante ang dalaga. Taud-taud, miabot na sila sa Colon ug didto sila manganaug duol sa ilado kaayo nga department store.

“Ugma, abli na ang mga tindahan mosuroy ta dinhi kay magpauban ko nimo kay mopalit ko’g t-shirt,” matud ni Reynante.

Gihatud ni Renante ang dalaga sa ilang balay sa Carreta. Sa wala pa sila magbuwag, nagbayloay sila og mga contact numbers. Pagka-ugma sa hapon, nagkita sila sa downtown basi sa ilang sabot.

“Mosulod na ta sa department store kay init kaayo para mabugnaw ang atong lawas,” giingnan ni Reynante si Fe Marie. Nagkalingaw sila’g panan-aw sa mga display nga baligya sa tindahan.

Mipaingon si Fe Marie sa dapit sa baligyaanan og kagamitan sa mga babaye ug gitan-aw niini ang nindot kaayo nga hair bond. “Wala ko makadala’g kwarta da, ibog kaayo ko aning maong hair bond,” matud ni Fe Marie.

Dali kaayo nga nakahukom si Reynante nga iyang paliton ang nagustohan ni Fe Marie nga hair bond. “Ikaw ang mobayad?” nagngisi ang dalaga nga misukna ni Reynante.

“Pamili pa para mosamot ka’g kagwapa,” matud ni Reynante. Mikuha pa si Fe Marie og para manicure. “Salamat kaayo Rey ha?”

Mipaingon usab dayon sila sa baligyaanan og mga T-shirt. “Mopalit ko’g t-shirt Fem, ikaw ang akong papilion,” giingnan ni Reynante ang dalaga.

“Sigi ha?” matud ni Fem nga mipaingon sa T-shirts section. Gipili ni Fe Marie ang usa ka green nga T-shirt nga adunay borda sa wala nga dughan.

Nindot tuod kaayo tan-awon ang mao nga t-shirt nga napilian ni Fem. Apan igo-igo ‘sab g’yud ang presyo kay mohapit na P800 ang kantidad.

“Ikaw, pagpili og imong t-shirt Fem kay gusto ko nga palitan tika para dili ka makalimot nako,” matud ni Reynante. Nakita ni Reynante nga mibathay ang pahiyom sa panagway sa dalaga.

Mas mahal pa kay sa T-shirt ni Reynante ang gipalit niya para ni Fe Marie. “Kana, mas angayan ka nianang maong T-shirt,” matud ni Reynante dihang gili-li niya sa fitting room ang dalaga.

Gigamit ni Reynante ang iyang ATM sa pagbayad sa ilang pinalit. - Sumpayan