Antusonon

Unsaon ko na man lang na imong maguwang?” nagtibi nga nangutana si Brenda ngadto sa iyang ikaduha ug kinamanghurang anak nga si Daisy. Nagtunol si Brenda sa suwat sulod sa sobre nga inablihan na. Human na’g basa si Brenda ug nanghubag na ang mga mata sa paghinilak.

Gidawat ni Daisy ang sobre ug gikoot ang suwat nga sulod niini. Naglingkod siya sa sopa sa ilang sala. Alas siyete ron sa buntag. Nagtan-aw si Daisy og Cable TV. Samtang si Brenda mao pay paggawas sa iyang lawak kay didto nagbasa sa suwat sa anak. Nagdungan og lakaw padulong sa ilang mga opisina si Dario, kapikas ni Brenda, ug si Daphne, panganay nilang anak.

Nagtubo sa kaharuhay si Daphne. Sila gyud hinoong duha ka managsoon ang pareho nga hayahay sa ilang kinabuhi gikan sa pagkabata hangtud sa pagkadalaga. Apan lahi lang ang resulta sa duha ka anak nga parehong gimatoto sa kabuhong, sa ilang mga ginikanan. Hatud-kuha sila sa eskuylahan og kotse. Dunay mga maid nga nag-atiman sa ilang mga gamit. Dili sila patabangon sa mga gimbuhaton sa  panimalay. Busa, wa sila’y nakat-onan.

Pagkahimugso ni Daphne, gigamitan og forcep sa midwife. Naglisod og gawas iyang ulo. Kay nabitik sa pusod iyang liog. Nalamboran sa pusod iyang liog. Sa mga kakaraanan pa, pantononon ang maong bata. Kun lalaki, maldito. Kay babaye man, maldita. Disiplinahonon. Mao nay panagna sa mga karaang tawo mahitungod sa usa ka  puya nga nabalighotan og  pusod sa liog sa dayong pagkahimugso.

“Nganong ikaw, maayo man lagi? Di man maghatag og kagool sa iyang ginikanan?” ni Brenda ngadtong Daisy.

“Di man gyud magpareha ang kinaiya sa duha ka tawo. Bisa’g kaluha pa sila” ni Daisy.

Nakatapos og kursong BS Psychology si Daphne. Paggradwet, nakauyab dayon. Usa ka tuig na kapin ang ilang relasyon ni Kenneth. Kauban ni Daphne si Kenneth sa Call Center ilang gialagaran.

Fine Arts major in Interior Designing ang kurso ni Daisy. Pagkuha niya’g board exams, 9th placer siya. Wa siya’y honors paggradwet. Apan nalabwan niya ilang Cum Laude. Kay igo lang nakapasar. Wa makasulod sa Top Ten. May nikuha niyang dakong kompanya. Suweldado siya’g dako. May mga kliyente sab siya gawas sa iyang kompanya. Busa, nagtukod sab siya’g iyang kaugalingong opisina. Duha ka tuig niyang panarbaho, nakapalit dayon siya’g kotse.

Sa kinitaan ni Daisy, dako siya’g natabang sa iyang ginikanan. Puro diabetic iyang mga ginikanan. Dunay gipangmintin nga tambal. Siya ang tigpalitan sa ilang mga tambal. Kay si Brenda plain housewife man lang. Si papa Dario niya, usa ka CPA apan sa iyang  pangidaron ug panglawas, semi-retire na siya. Minus na og mga kliyente. Si Daphne, dako sab untag sweldo, apan ang kita niya kulang gani sa iyang panghindik. Mahal kaayo siya’g mga gamit. Unya dako’g gasto sa load sa selpon ug sa mga facebook.

Nanghupaw si Daisy pagkahuman niya’g basa sa suwat ni Daphne.

“Bisan magkinaunsa, anak gyud gihapon nimo si ate Daphne. Dawata na lang ang nahitabo niya” malumong pulong ni Daisy dungan ang paggakos sa inahan ug hapohap sa bukobuko niini.

“Si papa nimo, wa pa ra ba masayod sa kahimtang karon ni Daphne,” ni Brenda. Naghingoshingos.

“Ipabasa na lang unya nang suwat inig abot ni papa,” ni Daisy.

Gibasa og usab ni Daisy ang unod sa sulat.

“Ma, Pa, pasayloa ko ninyo. Mabdos na ko. Unya way planong mangasawa si Kenneth. Ay lang ninyog gukda si Kenneth. Buhion nako ang bata. OK ra ko nga mahimong single mom -- Daphne”.

Gibilin ni niyang sulata ganihang buntag sa dayong pagbiya ni Daphne sa ilang balay aron motambong sa trabahoan. Wa nay seguro kun mopauli ba to siya. Naglikay nga madapatan sa amahan. (Kataposan)