Kainit sa gugma

Naglagiting ang kainit sa adlaw atul sa pagpahigayon sa Siete Palabras kaniadtong Biyernes.

Pulos nagdiyong ang mga mata sa mga tawo nga naminaw sa pagbatbat sa katapusang pito ka pulong sa atong manunubos didto sa Barangay Dulho-Fatima.

Miipli si Reynante niadtong hamtong babaye nga nagbitbit og payong para paapil siya nga masalipdan sa kainit sa adlaw nga daw nagpamahit ang kainit. Apan sanglit dunay tupad nga bata ang maong hamtung babaye, kabahin lang sa lawas ni Reynante ang malandongan. Taud-taud, nakabantay si Reynante nga tibuok lawas na niya ang nalandongan.

Mihangad si Reynante ug nakita niya nga may laing payong nga midikit sa payong niadtong hamtong-babaye. Paglingi ni Reynante, iyang nakita ang usa ka babaye nga nagpahiyom kaniya.

“Ako na nga gituyo para dili ka mainitan,” matud sa babaye ngadto ni Reynante. Mibawos si Reynante sa pagpahiyom sa babaye. “Ako na la’y gunit sa payong bi kay maikog ta nimo da,” matud ni Reynante dayong kuha sa payong.

“Nahago ka na hinoon,” matud sa babaye. Gipasiklapan ni Reynante ang babaye, hamis kini og pamanit ug arang-arang og pamiste nga gisul-ob. Nasabot ni Reynante nga mora’g dili  taga Dulho-Fatima ang maong babaye kay sagad sa taga didto maila man nimo sa ilang linihokan ug sapot nga gisul-ob. Nakabantay man gud si Reynante nga sagad sa usa ka tawo kun anaa ra sa iyang palibot, dili na kini mag-ilis og arang-arang nga sapot. “Taga dinhi ka sa Dulho?” wala gayud makaagwanta si Reynante, iyang gipangutana ang babaye. “Dili uy, taga Carreta ko. Sa una gud dinhi man ko adtong nagpalansang si Bargayo sa Krus, duna man ko’y tiya nga taga diha sa unahan,” matud sa babaye.

Nagpaila si Reynante sa babaye. Nagpahiyomay sila nga nagtug-anay sa masi’g nila ka ngalan. Si Fe Marie diay ang ngalan sa maong babaye. Human sa gipahigayon nga Siete Palabras, gidapit ni Reynante si Fe Marie nga mag-snack sila sa usa ka duol nga bakery.

“Mopauli ka ba karon sa Carreta?” gisukna ni Reynante si Fe Marie. Igo lang miyango si Fe Marie dayon mitungab sa softdrink. “Kun mao kana, pwede ra nga magkuyog na lang ta pagpauli kay duol ra man diay ta’g paulian,” matud ni Reynante.

Dali ra kaayo nga nagkasuod sila si Fe Marie ug Reynante. Gidala gani ni Fe Marie ang bag-o niyang higala sa balay sa iyang iyaan nga nahimutang dili ra layo sa Barangay Hall sa Dulho.

“Nagkaila mi didto sa gihimoan sa Siete Palabras manang tungod sa kainit sa adlaw,” giingnan ni Reynante ang iyaan ni Fe Marie.  (Sumpayan)