Duha ka

Niadtong panahon sa atong Ginoo, ang labing bug-at nga silot sa mga nakalapas sa ilang balaod mao ang kamatayon sa krus. Kun sa ato pang panahon, katumbas kana sa kamatayon sa silya elektrika.

Apan ang silya elektrika, dili mag-antus ang kriminal sanglit patyon siya niini sa kalit ug sa pipila lang ka minuto. Wala hisgoti kun kinahanglan ba gayud nga ilansang sa krus ang usa ka makasasala. Daghan sa mga kriminal nga gigapos lang sa krus apan patindogon kini ilalom sa kainit sa adlaw.

Ang kagutom ug kauhaw lakip ang kainit sa adlaw igo na nga mopatay sa tawo nga anaa sa itaas niini. Pun-an pa sa kaulawan nga bation sa anaa sa krus sanglit niadtong panahona, wala pa mauso ang brief o kaha kansonsilyo ug ang panty sa mga babaye. Busa ang ilansang o kaha gapuson diha sa krus, hubo gayud (totally naked).

Polite lang ang nag-dibuho sa larawan sa atong Ginoo kay iya pa man nga gibutangan og  bahag.

Apan angay natong mahibaloan nga ang atong Ginoo dili buot nga mahiagom siya sa kamatayon sa krus. Iya kining gipakita sa iyang pag-ampo sa Amahan didto sa tanaman sa Getsamane nga matud pa niya, “Amahan ko, kun mahimo, ikasaylo kanako kining kopa, (ang mahitungod sa iyang kamatayon sa krus) apan dili ingon sa kabubut-on  ko kundili sa imo.”

Busa gidawat sa atong Ginoo ang kamatayon sa krus sanglit mao kana ang kabubut-on sa Amahan nga maoy nagsugo kaniya. Nahibalo na siyang daan sa iyang dangatan ug kun unsa kasakit ug kamakauulaw ang iyang mahiagoman apan gipalabi niya ang tanang kasakit ug kaulawan, matuman lang ang kabubut-on sa Amahan.

Amen ang atong Ginoo. Buot ipasabot nga wala siya’y supak sa tanang gusto sa Amahan.

Amen. Oo, bisan kamatayon sa  krus. Ingon niana ka mapinaubsanon ang atong Ginoo sa kabubut-on sa Amahan. (Kataposan)