Maria Magdalena

Ako si Maria Magdalena. Nagdako ako gikan sa usa ka pamilya nga medyo lisudlisod ang kahimtang sa panginabuhian. Busa isip panganay nga anak ako gyud ang mitabang sa akong amahan sa pagpangita og kuwarta aron duna mi magamit sa among pang-adlaw-adlaw nga gastohan sa balay ug sa among pagtuon sa akong mga igsuon. Bisan unsang matang sa trabaho nga buhaton sa akong amahan, sama sa pagpangisda, o bisan sa umahan, bisan sa pagpaninda ug pagmaneho sa motor o habal-habal ug tricyle ako na kining nasulayan.

Tungod sa among kalisod, usahay makalimot ko kun lalaki ba ako o babaye. Ug tungod niini daghan ang nag-ingon nga lakin-on ako’g panglihok. Mao usab kini ang akong nabantayan sa akong kaugalingon. Apan nasayod ko nga kasingkasing sa usa ka babaye ang ania sa akong dughan kay maibog man og lalaki. Gani may crush man ako sa among eskuylahan sa Sta. Ana Academy. Ugaling lang kay wala tingali siya makagusto nako kay giisnab man niya ang akong beauty.

Siya si Elizar. Tungod ba kaha usab kay lakin-on man lagi ang akong panglihok mao nga na-turn off siya nako. O kaha wala gyud siya’y feelings diri nako, maong wala lang ko niya hatagi’g pagtagad. Ang ako man hinuong classmate nga si Nestor maoy nanguyab nako. Silingan ra kami maong nakaila ko kaniya. Kini si Nestor naila sa iyang pagkabugalbugalon sa among eskuylahan ug sa among dapit. Dihang iya kong gipanguyaban, nagtuo ko nga iya lang kong gibugalbugalan.

“I love you, Maria,” niya pa.

“I love you sa imong kagaral,” matud ko sa maisogon ug malagoton nga tingog. “Ayaw gyud ko i-apil-apil sa imong kabuang kun di ka gusto makatilaw og lami!” -- Sumpayan

Pa