Single Parent Gula 7

Nangaligo pagbalik sa dagat sila si John ug Jessyl. Daw tua sila sa paraiso kay pulos katawa ug kalipay ang ilang gibati. Taud-taud, namalik na ‘sab sila sa cottage ug subli nga nagparayganay.

“Sus, ug dili ka pa minyo John, moipon g’yud ko nimo kay mora’g mabuang ko nga magpuasa unya sa gipatagamtam nimo nako,” matud ni Jessyl nga nagpahiyom.

Gitutokan ni John si Jessyl. Wala siya motubag sa gisulti niini kay nasayud siya nga wala kini magbinuang. Ang tanang babaye nga gikaparayganay ni John susama gayud og isulti human sa ilang kumbati.

Hapon na sila nga namauli. Aron walay makakita nga sila nag-uban, didto ra gipakanaug ni John si Jessyl sa dalan Colon. Iya kining gihatagan og P1,500. Nalipay kaayo si Jessyl nga mitutok lang sa dayong pagpadagan ni John sa motor.

Pagka sunod adlaw. “Dong ikaw na la’y tambong sa recognition ni Ryan kay naglain ang akong lawas uy,” matud ni Arlene nga asawa ni John.

Pwerteng nakapamalibad ni John. “Ikaw na lang Day kay dunay importante nga trabahoon nako sa opisina, dinalian kaayo ang sugo ni sir nako,” ni John pa.

Ang tinuod, dili na gusto ni John nga magkakita pa sila si Jessyl kay naamgohan na niya ang dakung sayup nga iyang nahimo.

Naabtan man gud niya si Arlene nga nanglaba pag-abot niya gikan nga nakigpangaligo ug ni Jessyl. Nakonsensya si John kay daghan kaayo ang gilabhan ni Arlene, apil ang iyang mga karsones.

“Inighuman sa recognition, apasa lang ko sa opisina kay isuroy nato si Ryan para ‘sab malingaw ta Day uban sa atong anak,” matud ni John.

Igo lang mipahiyom si Arlene nga wala gayud masayud sa tinuod nga rason nga dili na gusto si John nga moadto sa tunghaan.

Pag-abot ni John sa iyang opisina, nakadawat siya’g text message gikan ni Jessyl. “Pare John, wa ka lagi moari sa school karon?” ni Jessyl pa.

“Magkita ra unya ta, may isulti ko nimo,” ni John pa. Dali nga mipaingon si John sa tindahan nga namaligya’g selpon, mipalit siya’g bag-ong simpak.

Nag-ilis si John og simpak sa iyang selpon para dili na siya makontak pa ni Jessyl kay gusto niya nga bugtoon na ang relasyon nga nagbugkos tali kanila.

Giteksan dayon niya si Arlene sa bag-o niya nga numero ug giingnan nga na PUK ang iyang simpak mao nga mipalit siya’g bag-o nga simpak para sa iyang selpon.

Giisip ni John nga ang nahitabo tali kanila ni Jessyl usa lang ka damgo nga niining iyang paghigmata gikan sa kasaypanan nga iyang nahimo, gusto na niyang makalimtan. – (Kataposan)