Prayer of prophet Jeremiah

Si Eric paralegal assistant sa tulo ka abogado. Nakahuman siya’g abogasya. Apan wa naabogado. Kay niya pa, wa siya kakuha’g bar exams. Ambot tinood ba? Kasagaran man god sa mga law students, di magsabasaba kun mo-bar. Kay kun mahagbong, sayon ra pag-ingon “wa ko ni-bar”. Kaklase ni Eric sa abogasya sila si Atty. Rudy Gamot, Atty. Mario Cogon ug Atty. Ernie Sapli.

Si Mario kausa ra ni-bar. Pasar dayon. Sila si Rudy ug Ernie, take-two. Kay nahagbong sa primirong pagkuha. Kun si Eric pasultihon, wa pa gyud siya ka-bar. Mopahiyom lang ang tulo niya ka higala kon bar nay hisgutan.

Sa tulo ka abogado, si Rudy ang paborito ni Eric. Kay niya pa, cowboy nga abogado si Rudy. Way libog. Dili seko nga pagkatawo. Pero nagduda siya nga barangan. Sulod lang sa napulo ka tuig nga pagpanglaban ni Rudy, tulo na ka atbang niya nga abogado ang nangamatay.

Ang paralegal sa abogado mora nag clerk/messenger/research. Masugo sa abogado sa bisa’g unsa nga lakaw kalabot sa transaksiyon o kaso. Usahay, mahimong fixer kay wa may kahadlok matangtangan og  lisensiya. Wa may lisensiya ang paralegal. Way matangtang kun dunay bolilyaso.

“Matay, Rud, nahimo   ka mang sumsuman sa imong brother lawyers. Kay kamao kono ka manaut sa mga abogado nga mo-personal nimog kontra” ni Eirc usa ka hapon nga nibisita siya sa abogado. Gipaagi lang niya’g lakbit nga komedya iyang pagsumbong. “Ayaw gyug tuo anang barangbarang o daut. Wa gyud ko ana. Sa panuway na. Gahum sa Diyos ang nagpaabogado nako” ni Rudy. Hapit nangugat. “Giunsa man gyud nimo pagpasar sa bar?. Hatagi kono ko’g tip” ni Eric. “Sa di pa ko mobasag law books, Bibliya unahon nako. Kay matud pa sa mga pastor, The word of God is the foundation of knowledge” ni Rudy. “Wa diay to nimo baranga sila si Atty. Frank Alinod, Atty. Manuel Colando ug Atty. Serge Repeke?” ni Eric. “Wa intawon oy. Daghang nahibawo nga gibinuangan ko nila. Apan pulong sa Diyos ra gyuy akong nalitok Conquer evil with good. Love your enemies!” ni Rudy.

“Giunsa man diay ka ni Atty. Alinod?” ni Eric. “Nag-areglo mig kaso. Akong kliyente nadasmagan sa sakyanan sa iyang kliyente. Nangayo akong kliyente og P50,000. Iyang gipangayo sa iyang kliyente P300,000. Kay niya pa P100,000 sa biktima. Unya P200,000 sa abogado, akoa kono. P50,000 ray iyang gihatag, ug gihatag ko tanan sa akong kliyente. Wa ko nangayo’g attorney’s fee kay paryente sa akong asawa. Unya dangtag usa ka buwan, ginawong ko sa akong kliyente. Niya pa, maong wa ko nangayog bahin sa P50,000 kay mas dako diay akong nadawat. Nahingangha ko. Giingnan ko siya, pangutan-a si Atty. Alinod, pilay akong nadawat. P250,000 gyud kono akong nadawat, sumala ni Atty. Alinod. Dog-eat-dog usahay ang mga abogado” ni Rudy. Subo ang nawong.

“Grabeha sa! Nahalin diay ka!” ni Eric. “Sagrado para nako akong diploma gikan sa Supreme Court. Para nako, regalo ni sa Diyos. Di god ko honor student. Daghan ganing mga Laude, mahagbong pa” ni Rudy. “Nganong may dautan mang mahitabo sa magbinuang nimo?” ni Eric. “Wa ko kahibawo. Apan ang Bibliya ray makatubag ana. Nia man gyud ni ibabaw sa akong lamesa pirmi. Paklia sa Book of Jeremiah, Chapter 17 verse 18” ni Rudy. Gibasa ni Eric: “Bring disgrace on those who persecute me, but spare me, Lord. Fill them with terror, but do not terrify me. Bring disaster on them and break them to pieces” “Kada buntag ako nang gipangadye” ni Rudy. Nangurog ang kaunoran ni Eric. Nanglimbawot iyang balhibo. (Kataposan)  (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag.)