Single Parent - Gula 4

Nasabtan ni John nga pwerteng lipaya ni Jessyl nga gihatagan niya'g selpon. Gawas nga bag-o ang selpon nga iyang gihatag, may pakapin pa nga P500 nga load.

Wala na'y hunong ang ilang pagteksanay ni Jessyl ug John. Gi-register ni John sa ngalan nga Pare Jess ang numero niini sa iyang selpon aron nga kun mabasahan sa iyang asawa ang text, dili magduda.

Gisabot usab ni John si Jessyl nga Pre John ang itawag kaniya kun mopadala og text message. Nakasabot si John nga nasayud na si Jessyl sa iyang tumong sa pakigsuod kaniya.

Adlaw'ng Sabado, day-off ni John sa trabaho. Nakahuna-huna siya nga suwayan niya'g agni si Jessyl nga magdeyt sila. Nananghid si John sa iyang asawa nga mangaligo sila sa dagat ug ang mga kauban niini sa trabaho.

"Agion tika sa inyo Pare Jess kay mag-angkas na lang ta sa motor paingon sa dagat," gituyo ni John nga kusog ang iyang tingog aron dili magduda ang iyang kapikas. Gipahinayan ni John ang volume sa selpon kay basin og madungog nga babaye ang atua sa pikas linya.

Misirit pagpadagan si John sa iyang motor paingon sa dapit nga gikasabotan nila ni Jessyl nga adto sila magtagbo. Unang miabot si John ug giparada niya ang motorsiklo sa daplin sa karsada.

Taud-taud, diha na si Jessyl nga nagkabiba og bag. "Asa man ta John," ni Jessyl pa nga nagpahiyom. "Adto ta mangaligo sa dagat nga layo-layo gikan dinhi, kanang walay nakaila kanato," matud ni John.

Tuod, paspas nga gipadagan ni John ang motor. Layo na kaayo sila og giabot. Paingon sa kasadpang dapit sa probinsya ang ilang rombo. "Siyaro og may nakaila pa kanato didto sa Toledo," matud ni John.

Saylo pa sa Toledo ang ilang giadto. "Mora'g lain na ning imong tuyo da kay layo na kaayo ang imong gidad-an nako," matud ni Jessyl dungan sa pagkusnit sa kilid ni John.

Pwerteng nakakatawa ni John nga gikusnit siya ni Jessyl. Iyang nahuna-huna nga nakasabot na si Jessyl sa iyang gusto nga mahitabo niining ilang lakaw. "Unya, dili kaha ka pangitaon ron sa imong misis?" nangutana si Jessyl kang John.

"Husto tuod, i-off nako ang akong selpon para dili makontak," ni John pa human sila maka-parking sa motor sa usa ka beach resort. Dunay mga cottage ang maong beach resort ug miabang sila'g usa.

Dihang didto na sila sulod sa cottage. "Kanindot sa tubig sa dagat uy, lawom ang dagat ug tin-aw pa g'yud," ni Jessyl pa. "Sigi na, pag-ilis na sa imong bathing suit," giingnan ni John si Jessyl. — Sumpayan