Single Parent

Wala makabantay ang babaye nga daw gihimbisan siya ni John. Kun ang panan-aw ni John may gahum pa sa paghukas sa gisul-ob nga sapot sa babaye, kaganina ra kini nga nahuboan sa iyang gisul-ob. May nahuna-hunaan si John. Gusto niya nga tabangan ang single parent nga nasugdan na niya sa pagtabang. Taud-taud miduol kaniya ang babaye  ug milingkod atbang sa iyang gilingkoran. “Uy, nagsigi ta ug sultihanay nga wala gani ta magkailhanay. Ako si Jessyl,” nagpaila ang babaye dungan sa pagtunol sa iyang tuo nga kamot kang John. Nagpaila usab si John kang Jessyl.

Samtang nagpaabot sila sa ilang giorder nga pagkaon, gisukit-sukit ni John si Jessyl kun ngano nga nakabaton siya’g anak nga nagtungha na karon sa Kinder 2. Gitug-anan siya ni Jessyl nga biktima g’yud siya sa pasalig sa kanhi niya classmate. “May kaanyag ka Jess ug dili katoohan nga gibuwagan ka sa imong boyfriend,” matud ni John. Mipahiyom si Jessyl ug mikuot sa iyang pitaka gikan sa iyang bag. May gikuha siya nga hulagway sa babaye.

“Tan-awa John, mao ni ako sa wala pa ko magmabdos,” ni Jessyl pa sa dayon niyang tunol sa hulagway kang John.

Wala g’yud mosipyat si John kay tinuod gayud nga gwapa si Jessyl. “Karon nabati na kaayo ko kay walay atiman sa panglawas tungod sa kaapiki sa budget,” matud ni Jessyl ngadto ni John. Gihatud ang ilang giorder nga pagkaon. Nangaon sila samtang padayong nagsultihanay. “Mangayo ko nimo’g contact numbers bi,” giingnan ni John si Jessyl. “Sori kaayo John, wala ko’y selpon kay apiki lang g’yud sa budget,” dali nga tubag ni Jessyl.

“Mao ba. Duna ko’y selpon sa balay nga wala gamita ako kadto nga ipagamit kanimo apan ayaw lang ipanabi nga gikan nako ang selpon,” matud ni John.  Nagbuwag-buwag sila human sa ilang pagpangaon.

Pagka ugma sa buntag, nananghid si John sa iyang misis nga mao na lang ang mohatud sa ilang anak sa school kay aron diritso na siya sa trabahoan. Misugot tuod ang iyang asawa.

Ang tumong ni John mao nga magkita na usab sila si Jessyl kay ihatag niya ang wala gamita niya nga selpon. “Salamat g’yud kaayo ani ha?” ni Jessyl pa nga pwerteng lipaya kay gisulod pa g’yud sa karton ang selpon nga iyang gihatag.

“Duna na’y load ang simpack ana Jess. Gi-save na ‘sab nako diha ang akong contact numbers,” matud ni John. Kadto maoy nakapasamot sa ilang kasuod. Kanunay na sila nga magteksanay. - Sumpayan