May kinabuhi ang kalabera

Adlaw sa mga minatay. Gabii na. Mao pay pag-abot sa mag-agaw’ng Ariston-Bogart nga miduaw sa panteyon sa ilang lolo Kadyo. Dili bulak ug kandila ang ilang gidala. Kundili, mga binotelyang bino. Anhi sila magpalabay sa kagabhion. Busa, mag-inom sila. Dihang sugdan na unta nila’g inom ang imported nga ilang dala, didto pa sila makamatngon nga nakalimtan diay nila ang baso. Unsa na man lay ilang ipisan? Nagkatinan-away ang mag-agaw.

“Ah, sayon ra na, Gaw.” Daling putol sa kahilom ni Ariston. “ Huwat lang dinhi, kay mangita ko’g tiingan!” Daling lakaw sa giilang kinabagsikan sa ilang dapit. Taudtaod, nahibalik nga aduna nay dalang ulo sa kalabera sa tawo. Giporma pang daan og pupareha sa hungot.

“Unsa man na, Gaw? Unsaon man na nimo?” Sukna ni Bogart nga nakalitan.

“Mao ni himoon natong ipisanan, Gaw.” Mapagarbuhong tubag ni Ariston nga nagtingsi.

“Haaa????” Nahasiga ang mga mata ni Bogart. Mipugong! “Pero, Gaw, balaan intawon nang imong gigunitan. Basig magabaan ta!”

“Ay, susss!!! Tuo man ka’g gaba, Gaw. Wa man gani ta mahadlok sa mga buhi nga atong gipamatay? Unsa na kaha kining linalang nga patay na?” Pasiatab sa malditong lider sa  frat.

“Pero, Gaw. Lahi ang mga patay kay sa mga buhi. Sila nakakita nato. Pero kita, wala! May talagsaon silang gahom nga di ug di ta makasukol!” Dugang pahayag ni Bogart.

“Ah, motuo man ka ana, Gaw. Kun di ka, aw .... ako na lay gamit ini.” Dayong abli sa brandy ug gihuwad sa ulo sa kalabera. Dihadiha, giyarok. “Ahhh...tanlasa, Gaw, uy!” Ug miipis na sab. Tapos, gitunol ngadtong Bogart. Namugos! “ Oh, imo na sab, Gaw, oh!”

Apan mibalibad si Bogart. “Di lang gyod ko, Gaw. Bisag may pagkabagis ko, girespeto ko ang kalabera sa mga patay. Gani, angay man silang ampingan ug iampo, Gaw.”

“Punyetaaaa!!! Rason sa usa ka talawan!” Labihang sukoa ni Ariston. May gikuha siya sa iyang kilid -- usa ka paltik nga rebolber, gikak ug gikablit dul-it sa ulo ni Bogart. Apan wala kini mobuto. Gikak na pod ug  kabliton na usab unta dihang may naglutaw’ng kalayo nga mihasmag sa nahimutangan ni Ariston. Napalid-lup-og nga daw giyab-ag gasolina ang nagsigang lawas sa gikahadlokang bugoy sa San Isidro. Hinuon, sa daklit, napawong ra sab ang kalayo. Wala nay kinabuhi si Ariston tupad sa kalabera nga maoy gihimo niyang paya kaganina.

Naestatuwa si Bogart nga nakasaksi sa kinatibuk-ang hitabo. Dinhi misamot kahugot ang iyang  pagtuo nga dili lang sagrado ang kalabera. May kinabuhi pa gyod kini nga sakitan kun bugal-bugalan sa mga buhi. (Kataposan)