Palace of justice dili just

Dili ka kabastabasta’g sulod sa Palace of Justice. Grabe kahugot ang mga security guard nga nagbantay sa pultahan. Mag-short pant ka? Di ka kasulod! Magtsinelas? Samot! Mag-sliblis? Bugawon ka! Ako gani, kadtong may tuyo ko didto, gialihan ko kay espadrel ra man gud ang akong sapatos, made in Carcar City, unya nag t-shirt lang.

Naahat tawon ko’g uli sa amo, uy! Napugos pagsul-ob sa polo long sleeve ug panit sapatos ni Tatay nga puwerteng luaga! Pagbalik nako, gipangayoan ko’g ID sa duha ka guwardiya. “No ID, No Entry!” nila pa. Ingon niini sila ka segurista. Kaniadto, ha?

Apan higala kong si Nestor, dakong opisyal sa PAGCOR, miingon nga ang akong naagian, wala kuno niya masinati kay gisayonsayon da niya ang pagsulod-gula sa Palace of Justice. Wala siya sitaha sa pagsul-ob la’g niya’g t-shirt ug panit nga tsinelas. Wala gani siya kapkapi ug pangayo-ig ID. Mao ba? Hinuon, mas desente’g pamaro’g ang maong opisyal kay ning tagsulat. Unsaon  mas komportable man ko kun simple lang ang sinina nga isul-ob. Bahala’g baratohon, basta limpiyo, kontento na ko!

Sa sinugdanan, wa gyud ko motuo sa gisulti ni higalang Nestor. Pero dihang mibuto ang lanog nga balita nga may usa ka Canadian national John Pope nga naghuramentado sulod gayod sa Palace of Justice, diin nahagba patay ang doktor ug abogado human niya pusila sa iyang dalang 357 pistol ug nakaangol sa babayeng piskal, kinsa hangtod karon anaa pa sa talandugong kahimtang, daw nahugno ang silya nga akong gilingkoran, uy!

Didto pa ko motuo nga ang mga security measures nga giimplimentar sa Palace of Justice, dili diay sa tanang higayon hugot. Usahay, moluag ra! Ug kini depende sa klase sa tawo nga mosulod. Kun pobre, rikisahon ug istriktohon pag-ayo. Pero’g dato ang pamarog labi na’g foreigner, otomatik manglugak ang kalig-on sa ilang pagbabag. Fair and just ba kining inyong gibuhat, guard 357 ug 45 kalibre nga pistola ni Pope, ang duha gayod ka delikadong armas nakasulod sa higpit nga giguwardiyahang lugar? Grabeha! Lisod tohuan. Apan tinuod!

Mao na kini resulta sa dili pag-implementar sa atong balaod nga patas kanunay ngadto sa katawhan. Mao na kini resulta nganong si Pope ug higalang Nestor pasudlon man dayon sa guwardiya? Unya ako, wala? Nagpasabot ba kini nga ang balaud sa Palace of Justice may gipili ug pinalabi? Kadto baya si anhing Pope naghuramentado tungod kay wala kuno siya makaayon sa sistema sa atong pamalaud. Luyo sa iyang pagka-dautan, nabati pa niya nga dili husto ang timbangan sa atong hustisya. Hinungdan, nga iya na lang gikumkom ang balaud sa iyang mga kamot. Ngano? Kay alang kaniya, ang atong Palace of Justice is not just.

Hinaot pa unta nga ang gihimo ni Pope makapatul-id sa matud pa niya, hiwing pamaagi sa atong pamalaod.