Ang paa ni Claudia mangtas

MOTUO KA’G DILI (Matag Domingo)

Panadtaran, San Fernando, Cebu

Dugay na siyang nahigugma ni Claudia Minda. Si Claudia Minda anak sa magtiayong Gabriel ug Sandra. Guwapa si Claudia ug may pamanit nga puti ug pulahon. Mestisa ang porma sa iyang nawong ug daghan kaayong naibog ug nadani sa iyang katahum dinhi sa ilang balangay sa Suwab-Habol.

Usa sa dunay dautang tinguha sa dalaga mao si Abundio o Abon. Plano ni Abon nga iyang pahimuslan si Claudia kun mahitabo nga mag-inusara kini’g kaligo sa atabay ilawom sa dakong punoan sa anunang. Dunay higayon nga maligo si Claudia nga mao rang usa apan wala gyud katayming si Abon niini kay iatol man ni Claudia pagkaligo sa atabay kanang dulom ang kagabhion.

Busa, dili gyud mahitabong dunay makakita kang Claudia nga naligo sa atabay. Apan ning ulahing gabii, dunay nakasaksi kang Claudia nga naligo sa atabay ug kini mao si Mauro. Ulitawo kini si Mauro ug may hilom siyang pagbati sa dalaga. Bisan pa sa mga tabitabi nga ang inahan niini nga si Sandra kaliwat og ungo, wala katibhangi ang iyang hilom nga paghigugma sa dalaga bisan pa’g duna na kini sungay o di ba pako.

Alang kaniya ang iyang gugma anaa lang sa iyang kasingkasing ug dili sa lawasnon nga pagbati. Way pagkalarag ang iyang gugma. Ug karon kay bantang kaayo ang hubo nga lawas sa dalaga kinsa nagpaduay lang puti ug hamis niining paa ubos sa kahayag sa takdol sa buwan nangandoy si Mauro nga makapadayag na unta siya sa iyang gibati sa dalaga.

Unya kalit lang may tawo nga migakos kang Claudia Minda. Hubo usab ang lawas sa tawo kinsa kusganong migabling sa bigot kaayong lawas sa dalaga. Misinggit si Claudia. Karon nakita ni Mauro nga gialsa sa tawo si Claudia ug gidala sa may bagnotan nga galiundok ang bagang ling-on sa bulak sa utot-utot. Ug didto wala na mabati ni Mauro ang tingog ni Claudia.

Nahilom. Unya maoy mipuli ang singgit sa pakitabang ang tingog sa tawo. Nagkapaas lang kini ug unya nahilom pagka-taudtaod. Nagkurog si Mauro nga diha magpasalipod luyo sa dakong punoan sa anunang. Naglibog siya kun unsa nay nahitabo. Wala dangti’g dugay migawas si Claudia sa libon nga mga dahon sa utot-utot ug mibalik sa atabay ug mipadayon sa iyang pagkaligo.

Pagka-ugma, maoy nadungog sa eskina ang kamatayon ni Abon o Abundio nga nahabwa kuno ang tinai nga nangluspad kay wala nay dugo. Ug si Mauro nga nahibawo niini nagduda na kang Claudia kay wala may laing tawo sa atabay kun dili siya lang ug kadtong tawo nga buot molugos kaniya mao si Abundio nga karon patay na.

“Mauro, sayod kong nakakita ka sa paglugos ni Abundio nako, di ba? Diha ka sa luyo sa punoan sa anunang,” ni Claudia pa ngadto sa nangluspad nga ulitawo. “Sayod sad kong nahigugma ka nako, di ba?”

Miyango si Mauro.

“Okey, ugma paaboton ko ikaw sa atabay, maayo ugma kay hayag ang buwan, makita unya nimo ang kaanindot sa akong puti ug hamis nga paa,” mipahiyom si Claudia nga milakaw. Samtang ginuntan ni Mauro si Claudia nga nagkalayo na sa iyang panan-aw, nabatyagan niya ang pagpanglimbawot sa iyang mga balahibo, kay didto sa iyang hunahuna nahulog ang usa ka pagtuo nga si Claudia mao ang mibalbal kang Abundio manglulugos. (Kataposan)