Kaliwat ni Magdalena Gula 7

Pagka sunod adlaw atol sa lunch break, nagkalingaw si Manny pagbasa-basa og mga balita sa mantalaan. Pag-ukab g’yud niya sa ikaduha nga pahina, may nakadapit sa iyang pagtagad.

Nabutang sa ulohan sa balita “Tulo ka buring, dakpan.” Gisud-ong niya ang hulagway nga diha tupad sa balita ug misamot nga nadapit ang iyang pagtagad kay nailhan niya nga si Jessa ang usa kanila.

Gibati’g kalooy si Manny. Gibutang sa balita nga padayon pa nga gipriso ang tulo kay wala makabayad sa multa. Pagka hapon wala maglangan si Manny miangkas dayon siya sa iyang motor sa pag-off niya sa trabaho.

Midiritso siya sa Cebu City Police Office ug gibisitahan si Jessa. “Ako’y motabang nimo nga makabayad ka sa imong multahanan Jess,” giingnan ni Manny si Jessa.

Nahimamat ni Manny ang higala niya nga opisyal sa kapolisan ug gihangyo nga samtang wala pa mapasaka ang kaso siya lang usa maoy mo “MR” ni Jessa.

Ang “MR” nagpasabot nga memorandum receipt nga nagmatuod nga si Manny maoy pangitaan kang Jessa kun kinahanglan na ang iyang presensya sa kapolisan.

Tuod, nakagawas sa bilanggoan si Jessa. “Salamat kaayo nga gitabangan ko nimo kay gikuyawan ko kay dunay polis nga naibog kaayo nako, iya kuno ko nga kuhaon karong gabii,” ni Jessa pa.

Nakahukom si Manny nga dad-on si Jessa didto sa iyang giestahan nga apartment. “Sigi sugot na lang ko nga adto matulog sa imong gipuy-an kay sa bilanggoan.”

Didto sa apartment nga gipuy-an ni Manny, naligo dayon si Jessa kay giinitan sa duha ka adlaw niya nga pag-estar sa bilanggoan sa kampo.

Misantop sa huna-huna ni Manny nga modungan na lang ‘sab og kaligo kang Jessa. Mipahiyom si Jessa dihang misulod si Manny sa banyo. Gituyo ni Jessa nga wala siradoi ang pultahan sa banyo.

Gisubli nila ni Manny ug Jessa ang gihimo nila sulod sa mabugnaw’ng lawak nga gisudlan nila didto sa V. Rama Avenue pipila ka adlaw ang milabay.

Bisan og parehas sila nga wala pa makakaon sa ilang panihapon apan abtik ang ilang kalawasan. Sa banyo pa lang, giangkon na ni Manny si Jessa.

Didto nila gitiwas ang ilang pagparayganay sa higdaanan ni Manny. Human sa ilang kumbati. “Gusto nako Jess nga moundang ka na sa imong bati nga pangita, magtipon ta og pasudlon tika og trabaho sa among kompaniya,” matud ni Manny.

Kalit lang mibathay ang pahiyom sa mga ngabil ni Jessa. “Tinuod ka Man? Ang tinuod gusto na ko nga mohunong pagka Magdalena og tingali karon na ang husto nga panahon.” (Katapusan)