Goodbye is not Forever Gula 106

Nag-una lang diay ang daotang hunahuna ni Albert. Mikatawa lang si Vanessa sa dihang iya kining gisultihan mahitungod sa daotan niyang katahap. Mihuwas ang kabalaka ni Albert.

“Gitabangan lang nako si Papa Victor paghuman sa iyang mga transaksiyon didto sa Bicol,” maoy pasangil ni Vanessa. Kun nasayod pa lang si Albert nga may gitago ang babaye kaniya, hayan dili siya huwasan sa kabalaka. “Hibawo ka na, negosyante si Papa. Medyo naglain lang ang akong paminaw sa akong lawas mao nga nagpabalay una kami og pipila ka adlaw didto una mopauli.”

“Karon dili na ako angay nga mabalaka bahin kanimo, Van,” nakaingon si Albert,” kay nahiuli ka na man.”

“Kay dili ka man gyud angay mabalaka nako, ba,” ni Vanessa pa. “Ania na ako sa maayong kahimtang. Wala ikaw angay hunahunaon mahitungod kanako. Hatagi sa tiningob mong pagtagad ang imong trabaho.”

Kahilom. Si Albert igo lang mitutok kang Vanessa.

“Kumosta na man diay tuod si Josheba?” Nagpakisusi si Vanessa.

“Mitawag siya kanako niadtong pipila ka mga adlaw,” tug-an ni Albert. “Nangumosta lang. Matag karon ug unya magsulti na sad mi sa skype.”

“Wala maghisgot kun kanus-a siya mopauli?”

“Dili pa kana angay hisgutan. Nasayod ko sa tagal sa panahon niya didto sa Canada.”

Nahilom si Vanessa. -- Sumpayan pa