Kaliwat ni Magdalena

Gula 2

“Tsiks ka sir?” subli nga pangutana sa babaye ngadto ni Manny. Miyango si Manny dungan sa pagpangutana sa presyo. “Three hundred ra sir uy,” matud sa babaye.

Miyango pag-usab si Manny ug gisinyasan ang babaye. Misunod ang babaye kang Manny nga nagpaingon sa nahimutangan sa giparkingan sa iyang motorsiklo.

Misakay dayon si Manny sa motor ug miangkas ‘sab dayon ang babaye. Kay mubo man ang gisul-ob sa babaye nga may pagka “tube” ang estelo, maayo nga pagka-display sa paa niini.

Sa wala pa mopadagan si Manny sa motorsiklo iyang gilingi ang babaye ug maoy nasugat sa iyang panan-aw ang daw pinanitan nga balanghoy nga paa sa babaye.

Takulahaw lang nga mitubod ang laway ni Manny. “Anha ra ta diha o, naay tag P50 ang kwarto,” matud sa babaye dungan sa pagtudlo sa dapit sa Legaspi Street. “Ayaw, basin daghang dugho diha,” ni Manny pa.

Misirit si Manny sa kinaham niya nga palabyanan sa oras dapit sa Happy Valley sa V. Rama Avenue. Maayo didto kay aircon, limpyo ug kusog ang shower.

Dali ra sila nga miabot. Gipasulod ni Manny ang iyang motorsiklo sa bakante nga grahe ug abtik kaayo ang roomboy nga misirado sa pultahan sa grahe.

Misaka dayon sila si Manny, nag-una ang babaye. Didto sa sulod, gihukas ni Manny ang iyang kawo ug gitutokan siya sa babaye.

“Dili ba ikaw man kadtong akong giduol kagahapon nga mibalibad gani?” matud sa babaye. Igo lang mipahiyom si Manny nga mihapyud-hapyod sa hawak sa tsiks.

“Unsay imong ngalan,” ni Manny. “Lina ang akong ngalan, ikaw?” matud sa babaye nga mibawos dayon pagpangutana.

Nagpaila si Manny. Lina? Tukma ‘sab sa ngalan nga Magdalena apan nasayud ko nga angga ra ninyo ang inyong itug-an sa mga customer,” giingnan ni Manny si Lina.

Gisugdan dayon sa babaye pagtangtang ang botones sa polo shirt nga gisul-ob ni Manny. “Ayaw usa, magsultihanay usa ta kay gusto ko nga masayud kabahin sa inyong trabaho,” ni Manny pa.

“Sus makalangan na uy, kinahanglang mobalik dayon ko sa Colon para makakwarta ko kay nagkinahanglan ko og kwarta,” matud ni Lina.

“Ayaw kabalaka Lin, doblehon nako ang akong bayad nimo o mahimo pa nga katuloon basta ayaw lang pagdali,” giingnan ni Manny si Lina.

Tuod, nagtupad ra sila sa paghigda. Migakos kang Manny ang tsiks. “Suginli usa ko nganong nasulod ka man niining imong trabaho Lin,” pakisayud ni Manny.

Mitakilid si Manny ug gigakus ang si Lina nga naghayang paghigda. (Sumpayan)