Goodbye is not Forever Gula 102

Ug ilang namatikdan nga inanay na nga mipaubos ang gisakyan nilang airplane dungan ang pagpahibalo sa usa ka stewardess nga sa dili madugay motugpa na ang flight 365 sa airport sa Lapulapu City.

Wala madugay, mitugpa na gyud ang ayroplano sa tugpahanan. Wala’y kakulian ang ilang pagbiyahe.

Paggawas nila sa arrival area, nagtawag gilayon si Mr. Santos og taxi ug nagpahatod sila sa ilang pinuy-anan.

Sa ilang pag-abot sa balay, managsama silang naglikay paghisgot sa sakit ni Vanessa atubangan sa inahan niini. Ang ilang panagsulti naglibot lang kanunay sa gustong buhaton ni Vanessa aron malingaw ug makuhaan ang bisan unsa man nga hunahuna niya mahitungod sa iyang kahimtang. Nahimo gyud sa amahan ug anak ang pag-lilong una sa tinuod nga sakit ni Vanessa ngadto sa iyang inahan. Maoy ilang gipagawas nga over-fatigue lang ug kinahanglan ang igo-igong pahuway.

“Libang ka man gud kaayo sa trabaho ning ulahing mga adlaw mao nga nagkasakit ka, anak,” nagkanayon ang iyang mama Benida samtang kini naghapnig sa hapin sa kama ni Vanessa. Bisan kini’g maldita apan pinangga si Vanessa niini. “Makadaot ang sobrang paghago sa lawas.

“Mao bitaw kanay akong plano, Ma,” ni Vanessa pa nga mipahiluna sa iyang lawas sa ibabaw sa mahunolhunol nga higdaanan. Didto pa kami si Papa sa Manila, nahunahuna na nako nga mo-istar una dinhi sa balay balig pipila ka adlaw. Giplano na nako ang akong mga bulohaton samtang ania ako dinhi.” -- Sumpayan pa