Goodbye is not Forever

Gula 101

“Ayaw na hasola ang imong kaugalingon mahitungod kang Albert,” nagkanayon ang iyang papa Victor. “Iampo lang nato nga wala siya hitakdi sa sakit nga mitakboy kanimo aron dili mosamot ka-grabe ang situwasyon.”

Nagpabiling nagduko si Vanessa sulod sa pipila ka gutlo human mamulong ang iyang amahan. Ang iyang hunahuna didto kang Albert. Nahingawa siya sa ulitawo. Makaluluoy usab si Albert kun nakakuha kini’g virus gikan sa subli-subli nilang pagtagay sa  lawasnong himaya.

“Suginli unya si Albert bahin sa imong kahimtang inigpauli unya nato didto sa Cebu,” nagkanayon ang iyang papa Victor agi’g pagtapos sa ilang panagsulti.

Sayo nga nanglakaw ang amahan ug anak dala ang ilang mga gamit. Nagpahatod sila’g taxi sa airport.

Pagsulod nila sa passenger’s terminal sa tugpahanan, mao gayoy pagpahibawo sa tinugyanan sa airport nga ang flight 365 sa Cebu Pacific nga mobiyahe paingon sa Cebu bukas na alang sa sumasakay. Midiretso sila si Vanessa ug iyang papa Victor pagsakay human mahiling sa tagdumala ang ilang mga tiket. Sulod sa airplane, gipangita gilayon nila ang ilang mga lingkoranan. Kadali ra nila kining nakit-an.

Daw kilab lang ang mga gutlo. Ang airplane nga ilang gisakyan inanay nga miaginod sa runway. Wala madugay, mi-take off na kini ug mibiya sa tugpahanan sa Manila.

Tulin kaayo nga milabay ang usa ka oras. Ang ilang gisakyang airplane haduol na sa Cebu. -- Sumpayan pa