Igo ra sa paghunahuna

Dear Tita Salie,

Maayong adlaw kaninyong tanan nga anaa sa Banat News, ug sa tanan nga tigbasahan sa pasabta column og ingon man kanimo, Tita. Hinaot nga kanunay kamong madasigon sa kinabuhi ug  malipayon kanunay.

Tagoa lang ko sa ngalan nga Dodong, 18 years of age ug usa ka ulitawo ug hangtod karon wala pa gyod koy uyab, Tita.

Ang akong  problema kabahin sa akong kaugalingon kay makalibog gyod pag-ayo. Dili nako masabtan  nganong lahi man ko sa uban. Daghan kaayo ko og kauban, Tita, nga mas bata pa nako nag-edad pa lang og 15,16 or 17 apan duna na sila’y mga uyab. Maibog gyod ko nila kun mag-estoryahanay sila mahitungod sa ilang uyab  kun makig-date sila kay wala man koy ikasulti.

Duna man unta koy hitsura, Tita, ug dili ko bati og nawong apan nganong mahadlok man bisan lang sa pagduol og babaye. Dili gyod nako kaya nga moduol ug makig-estorya kanila.

Gusto na unta ko nga makabaton og hinigugma, Tita, apan nganong igo ra man ko sa paghunahuna kanila. Unsa may angayan nakong buhaton aron maisog ko  ug makaharong moduol og makestorya sa babaye? Palihog pasabta ko. Thank you very much and God bless.

* * *

Dodong komusta,

Para kanako ang nahitabo kanimo karon maoy resulta sa gibuhat sa imong mga ginikanan niadtong bata ka pa. Sobra kaayo ang imong kamanggiuwawon tungod kay kulang ka sa exposure, wala kay kahigayonan nga mosulti, mopagawas sa imong feeling kun ganahan ka, nasuko ka o nalipay ka. Wala ka gianad nga makighalobilo ug makig-estorya sa laing tawo o sa laing mga bata dihang gamay pa ka. Ug karon ang resulta ubos kaayo ang imong self-esteem. Ubos ang imong pagtan-aw sa imong kaugalingon, busa, anaa kanimo kanunay ang bation ug kauwaw sa pag-estorya o bisan sa pagduol lang sa laing tawo.

Gawas sa kaulaw nga imong bation, anaa usab ang kahadlok. Mahadlok ka nga dili unya sila makauyon kanimo, nahadlok ka nga dili ka welcome sa uban mao nga  para safe ka dili na lang ka moduol og magpakahilom na lang.

Anara ang imong kaugalingon, Dodong. Wala nay laing makatabang kanimo kun dili ikaw lang gyod tungod kay dako na ka.  Ayaw kahadlok sa ilang reaction kun moduol og makigsulti ka sa uban. Duna kay kakayahan nga buhaton kini ug ayaw kahadlok tungod kay respetohon ka nila.

Anara ang imong kaugalingon nga makig-estorya. Kun dunay mga religious group or organization sa mga  youth sa inyong lugar apil niini aron maanad ka. Sa hinayhinay imo ra unyang ma-overcome ang feeling sa kaulaw ug kahadlok. -- Tita Salie