Valentine’s; Gugma luyo sa politika

Samtang nagbuhat si Wenda sa iyang homework diha sa pantawan sa ilang balay, may nihagtik sa bongbong nga linikit nga papel. Daw gibala sa tirador ug nitugpa sa sawog duol sa iyang toong tiil. Na-istorbo iyang gibuhat karong buntaga. Gipunit niya ang papel. Ug gilingi niya kun diin gikan.

Atbang sa ilang balay dapit sa silangan, giulang lang og barangay road, naa ang balay ni Vincent iyang hinigugma. Bintana sa lawak ni Vincent ang nag-atubang sa pantawan. Nakita niya si Vincent nga nagsenyas nga ipabasa ang papel. Niabli iyang baba nga mora’g nilitok sa pulong “basaha” apan way madungog nga tingog. Nasayod hinuon siya’s hinungdan sa lihok ni Vincent. Pabuwagon sila’s ilang mga ginikanan. Kay nag-atbang na sa politika. Dulot mas bukog ang politika sa atong nasud.

Gibukhad og dali ni Wenda ang linikit nga papel. Nagpanglingi siya sa sala nila ug sa tibuok balay. Kay di maayo nga may makahibawo nga duna sila’y komunikasyon ni Vincent.

“Magkita ta karong hapon sa library sa eskuylahan. Basi’g katapusan na lang ni natong panagkita,” matud sa sulat.

Gilingi niya si Vincent. Niyango niya. Nagpasabot nga ipaseguro gyung makaadto siya. Niyanguyango sab si Wenda. Apan gikulbaan siya. Kay basi’g makigbuwag na gyud niya si Vincent.

Fourth year high school na sila. Klasmet ug kababata. Nahimong mag-bestfriend. Ug nagka-uyab. Tulo na ka tuig silang uyab. Sakit kun magkabuwag pa sila. Nagsinaaray gud sila nga magpakasal humag gradwar nila’g mga kurso. Sa higala pa ilang masig ka amahan, wa sila’y supak sa ilang relasyon. Konsehal sila sa ilang balangay sa barangay Haripa. Karon, nakuha og lainlaing partido. Nagdungan og lansar pagkabarangay kapitan sa ilang barangay. Nagbungol na. Bisa’g layo pang campaign time. Kay nagyagyagay naman sa ilang mga baho. Nag-intrigahay na. Naglabayanay na og lapok sa usa’g-usa.

Nagtibi na si Wenda sa ilang panagkita ni Vincent sa library.

“Unsa may atong buhaton? Nga pabuwagan man ka ni papa nako?” ni Vincent nga nagping-it.

“Mosugot lang diay ka kun magbuwag ta?” ni Wenda. Pinahunghong ang tingog kay nia sila’s library.

“Ikaw? Mosugot ka?” ni Vincent. Nagping-it.

“Agad lang ko nimo,” ni Wenda.

“Kinahanglang mohukom gyud ka’s imong kaugalingon” ni Vincent.

“Kun ako ang masunod, di ko mosugot makigbuwag,” ni Wenda.

“Ako sab. Di ko gustong magbuwag ta,” ni Vincent. Naggunitay sila’s duha ka kamot. Magul-anon ilang hitsura nga puno sa paghigugma.

“Niay akong sugyot. Sukad karon, di na ta magkita nga kita ra. Magkita lang ta kun dunay mga affair sa eskuylahan. Apan naa sa pundok. Ipasabot nato sa atong mga ginikanan nga buwag na ta. Apan di tinuod. Total, batan-on pa man ta. Aron sab maka-concentrate ta’s atong pagtuon,” ni Wenda.

“Sige, okay ko, ana. Pero kinahanglang duna tay bearer kun magsinulatay ta. Kay imong selpon  mabasa man unya nas imong mga igsoon,” ni Vincent.

“Okay gihapon. Kay basin pa sunod eleksiyon, mag-uban na sab atong mga amahan. Kay matud pa, in politics, there is no permanent enemies and no permanent friends,” ni Wenda.

“Pero kita, permanent friends and lovers ni Vincent.

“Permanent friends and lovers,” ni Wenda.

“Do you swear to that?,” ni Vincent.

“I swear,” ni Wenda. Niisa sa iyang toong kamot.

“I swear too,” ni Vincent. Niisa sa toong kamot.

Dihang hapit na manira ang library, sila na lang ang estudyante sa sulod. Nikawat  gyud og hawok  si Vincent sa dalaga. Apan nibalos si Wenda. Ug nigakos pa gyud sa hinigugma. (Kataposan)