Kagwapa ni Ma’am

Reporter sa radyo si Glenn ug siya maoy gitahasan sa iyang news director nga mo-follow up sa reklamo sa usa ka ginikanan sa bata nga giingong gidagmalan sa iyang maestra.

Nahinabi na ni Glenn ang bata nga misugilon kaniya kun giunsa siya pagdagmal sa iyang maestra ilabi na sa higayon nga kini sapoton kun malangan pag-abot sa tunghaan tungod sa traffic.

Gipasaligan na usab si Glenn sa ginikanan sa bata nga dili gayud sila moatras sa kaso bisan pa og mohangyo ang maestra  nga pasayloon lang siya.

Gituyo ni Glenn nga sayo kaayo siya nga miadto sa usa ka tunghaang publiko nga nahimutang sa south district dinhi sa dakbayan sa Sugbo aron sigurado niya nga mahinabi ang magtutudlo.

Wala isul-ob ni Glenn ang iyang ID sa pagka media aron dili makabantay ang mga magtutudlo sa iyang presensya ug mahibulong unya sila. Miuban si Glenn sa mga ginikanan nga naghatud sa ilang mga anak.

Apan nagsugod na siya pagpangutana hain ang room sa maestra nga iyang gipangita. Atong gituyo nga dili ilhon ang tunghaan ingon man ang ubang detalyi kay sigurado nga mailhan ang mga character nga nalambigit niining kaagi ni Glenn.

“Wala pa dinhi ang maestra dong?” gipangutana ni Glenn ang bata nga maoy mireklamo. Taud-taud, nahimamat ni Glenn ang Mama sa bata nga mireklamo kaniya.

“Karon kay na-late na ‘sab to pag-abot sir, sipok na ‘sab ang ulo adto ug ang mga bata na ‘sab ang pahimungtan,” matud sa Mama sa bata. Samtang nagpaabot sa pag-abot sa maestra, nagkalingaw si Glenn sa pagsuroy-suroy sa tunghaan. Nakita niya ang usa ka maestra nga nagsuperbisar sa iyang mga tinun-an nga nanilhig.

“Good morning ma’am,” timbaya ni Glenn sa maestra. Gilingi siya sa maestra dungan sa mipahiyom. “Duna kay bata nga nagtungha sa Grade 3 sir?” nangutana ang maestra.

“No, wala nagpaabot ra ko sa maestra diha sa pikas room kay wala pa siya moabut,” matud ni Glenn nga mitutok sa batan-ong magtutudlo. “Naa diha magtungha ang imong anak?” dugang pangutana sa maestra.

Namalibad si Glenn ug natintal siya sa pagtug-an nga usa siya ka reporter sa radyo ug miadto sa tunghaan aron mo-interview sa maestra sa bata nga giingong gidagmalan.

Nasabtan ni Glenn nga mipakita og dakung kaikag ang batan-ong maestra nga makighinabi kaniya pagkasayud nga usa siya ka sakop sa media.

“Uy, kumusta na diay kadtong gihatag nga cash assistance sa City Hall kanamong mga magtutudlo, tinuod nga ipauli to namo?” matud sa batan-on nga maestra nga misugod na’g pahiyom kang Glenn.

Sanglit suheto si Glenn sa maong sitwasyon iyang gipasabot ang magtutudlo. (Sumpayan)