Ang Luha ni Eva Gula 7

Naglami gayud ang pagparayganay nila ni Eva ug Miguel. Hangtud nga wala na sila makapugong sa ilang tagsa-tagsa ka pagbati. Nagpanghiram na ang mga kamot ni Miguel sa kalawasan ni Eva.

Samtang nagkapyot sa liog ni Miguel, dunay gihunghong si Eva ngadto sa iyang boyfriend. Mitindog tuod dayon si Miguel gikan sa gilingkoran niini nga sopa ug misunod ni Eva  paingon sa iyang kwarto.

Nakasabot na si Miguel kun unsay gusto ni Eva nga mahitabo kanila niining higayona. Gipaandar ni Eva ang electric fan nga diha nagbitay sa bungbong. Abli ang bentana sa kwarto apan dili sila makita tungod kay gipaduko ang jalousie blades.

Mihigda si Eva sa iyang katre samtang mitutok sa iyang boyfriend. Mora’g nahisama si Eva sa usa ka piso nga nagpaabot na lang nga tukbon sa bitin.

Tuod, wala g’yud mosipyat kay mihamag na ang bitin kaniya. Gitapuk-an pag-ayo si Eva. Gitagsa-tagsa pagpanangtang ni Miguel ang mga salimbong sa kalawasan sa iyang girlfriend.

Namingaw ang tibuok lawak ug ang mihari mao ra ang sinagitsit sa nagpungasi nila nga pagparayganay. “I love you Ev…love you too Migz,” nagtubag-tubag sila si Eva ug Miguel pagkahuman sa ilang pagparayganay.

Mihigda si Miguel nga nagtakilid tupad ni Eva samtang ang tuo niyang bukton nagakus sa dalaga. Takulahaw lang nga mihilak si Eva.

“Nganong mihilak ka?” nakapangutana si Miguel. Wala dayon motingog si Eva. Mora’g naghuna-huna unsay isulti niya sa iyang boyfriend.

“Nakahilak ko Migz kay dali ra kaayo ako nga nadala sa tentasyon. Gitugyan ko kanimo ang akong kaugalingon sa tumang kasayon. Nakahilak ko kagahapon kay gibugto nako ang among relasyon ug sa akong boyfriend, apan karon mihilak ko kay ingon nabugto na usab ang akong kaugmaon.”

Gihapuhap ni Miguel ang dughan ni Eva. “Unsa gud na’ng imong gipanulti? Nagtoo ka ba diay nga human sa nahitabo kanato pasagdan ko ikaw Ev? Dili kana mahitabo.”

Milunga paghilak si Eva. “Sa ato pa, dili nimo ako talikdan karon nga imo na akong naangkon?”

“Mao kana Ev. Wala ako’y kabilinggan sa kinabuhi. Dili ko ikaw talikdan ilabi na nga nasuta nako nga ako pa ang unang lalaki nga nakaangkon kanimo,” ni Miguel pa nga mipatik og kiss sa aping ni Eva.

Nag-umog sa mga luha ang aping ni Eva. Sa makausa pa, gipahiran ni Miguel sa iyang palad ang aping sa dalaga nga nag-umog sa mga luha.   

Tagsa-tagsa sila nga misul-ob pagbalik sa ilang mga sapot ug mibalik didto sa hawanan sa balay. Daw sama sila sa bag-ong magtiayon nga wala pay anak kay nagpabuot ra kun unsay ilang buhaton. (Kataposan)