May luha ang kinatumyan sa kasuko

Nangatumba ang mga silya nga natindakan ni Undo dihang mipasok siya ilawom sa lamesa. Mipiti ang mga haligi nga maoy naigo sa masuk-anong bakos nga gihapak ni Sindoy, palahubog niyang amahan, nga gitumong unta ngadto kaniya.

Naputos na sa daghang bun-og ang kalawasan ni Undo. Daw dili na niya maantos ang kasakit sa nagpangagot nga bakos sa iyang Tatay, kinsa kaganina ra sige’g bunal kaniya. “Tay, maluoy ka! Husto na intawon. Dili na lagi ko mousab!” May kalaghaw na ang tingog ni Undo nga wala’y hunong sa pagsiyaok og pakiluoy taman sa ginhawa.

“Ah, buang ka! Gisugo tika’g sud-an, gihurot nuon nimo’g palit og numero sa masyaw. Unsa na man lay akong kan -on karon, ha?” Gihapsan na sab ni Sindoy ang bata nga miuk-ok intawo’g maayo.

Gisugo ni Sindoy si Undo pagpalit og duha ka hiwang humba sa merkado. Gipul-an na man god ang palainom nga amahan pagsige kao’g bulad ug ginamos nga maoy sud-an nila halos kada adlaw. Hinungdan, nga nakuot gyod niya ang kataposang tibuok P50 sa iyang bulsa nga salin sa iyang gigasto kagabii sa tubaan ni Nang Torya. Apan ambot, unsay nasulod sa ulo ni Undoy nga gihurot man nuo’g palit ang kuwarta og mga numero sa masyaw.

“Punyetaaa!!!” Gibunlot sa amahan ang nagkurog nang anak gikan ilawom sa lamesa ug sama sa Hudeyo, sa hinurot nga kusog gibalikbalik paglapdos ang kinatibuk-ang lawas sa bata. “Gahi gyod ka’g ulo sugoon, ha? Hala, kan-a ning akong bakos! Umppp!!!” Nia pa ... umppp!!!!” Siyagit sa tumang kasuko ug siyaok sa labihang pakiluoy daw nagbugno sa nag-uyog-uyog nilang kusina.

Nabuak ang baso sa lamesa nga naapil pagkaigo sa istenlis nga bilya sa bakos nga nagkadugo. Ug dungan sa pagpangatagak sa mga tipaka, nalup-og sa salog ang wala na maglihok nga Undoy. Dinhi pa molurang ang kabangis ni Sindoy nga gitaoban sa dili masungsong nga kahadlok. Dad-on unta niya ang bata sa ospital, apan patay na  kini. Wala madugay, miabot ang naghangos nga inahan, kinsa igo na lang sa paghilak nga migakos sa wala nay kinabuhing minahal. Taudtaod, may mga polis sab nga mibutho.

Pagka ugma, ang numero sa masyaw nga gipalit sa bata maoy nakadaog. Nangahulog ang mga luha sulod sa mga puthaw’ng rehas nga puno sa pagmahay. Mga luha nga sagad gayod moagas inig sangko niini ngadto sa kinatumyan sa kasuko. (Kataposan)