Ang Luha ni Eva

Gula 6

Mingaw ang tibuok balay nila ni Eva dihang misulod sila si Miguel. “Hain man diay ang uban ninyo nga kauban sa balay Ev?” nakapangutana si Miguel kang Eva human niya nga gipalibot ang iyang mga mata sa tibuok balay.

“Upat ra kami nga nagpuyo dinhi, sila si Papa ug Mama ingon man ang akong manghud nga tua sa tunghaan,” dali nga tubag ni Eva. Milingkud sila sa sopa ug nagsultihanay. Gitutokan ni Miguel ang dalaga nga attractive kaayo sa gisul-ob niya nga short pants.

Nakahuna-huna si Miguel nga komedyahan ang iyang girlfriend.”Nahibalo ka ba Ev nga dugay kaayo ko nga nakatulog kagabii? Dihang nakatulog na ko, takulahaw lang nga mipasunding sa akong damgo ang imong larawan.”

Miyamiid apan nagpahiyom si Eva nga nakadungog sa gisulti ni Miguel. “Bulatik g’yud Migz.” Nagkataw-anay silang duha ug maoy nakasugod sa ilang pagparayganay samtang nagtupad paglingkud sa sopa didto sa sala.

Gigakus ni Miguel si Eva. Wala lang ‘sab mopalag si Eva nga gigakus ni Miguel. Mainampingon nga gipahigda ni Miguel si Eva sa sopa ug gipaunlan sa iyang duha ka paa. Gihapyud-hapyud niya ang buhok niini ug gihapohap ang iyang mga aping.

“Sigurado ka ba Ev nga dili pa mopauli ang imong mga ginikanan ug igsoon?” iyang gisukna ang hinigugma. “Unya pa to sa hapon moabut si Junior, ug sila si Papa mga gabii na to mauli,” dali nga tubag ni Eva nga naghangad kang Miguel samtang nag-unlan sa paa sa ulitawo.

Mitikubo si Miguel ug anam-anam niya nga gipaduol ang iyang mga ngabil ngadto sa ngabil ni Eva. Nakita niya nga gipiyong sa dalaga ang iyang mga mata dihang nag-abut na ang masi’g nila ka mga ngabil.

“Mabuang g’yud tingali ko kun magkabuwag ta Migz,” giingnan sa dalaga ang iyang boyfriend dihang milunga ang ilang pagparayganay. Padayong gihapuhap ni Miguel ang aping sa dalaga. Dayon ang kamot ni Miguel midailos ngadto sa liog ni Eva.

Gigilokan si Eva kay mora kini og gipangirogan. Migara si Miguel ug inay mohunong, mipadayon hinoon sa iyang gihimo. Mikamang ang iyang mga kamot ngadto sa dughan ni Eva ug ngadto sa tiyan.

“Kalalim nimo nga momahal Migz uy,” matud ni Eva nga mikabyon sa liog ni Miguel. Mitikubo pagbalik si Miguel ug giukoban pag-usab ang mga ngabil sa iyang girlfriend. Alang kang Miguel wala gayud siya magmahay nga mipalta lang sa iyang trabaho.

Nagkainit ang ilang pagparayganay. Mibangon si Eva ug migakus pag-ayo sa iyang boyfriend. (Sumpayan)