Ang matam-is nga pagsulay

Papa, wa na ba gyu’y kagawasan ang akong kasingkasing,” ni Helen nga nagpakilooy sa iyang istriktong amahan,” mopili og lalake nga makauban sa tibuok kong kinabuhi?”

“Hilum diha Helen, ako’y nahibawo sa maayo mong ka-ugmaon.”

Apan may hinigugma, si  Jimmy nga gikasilagan pag-ayo ug gikulata sa iyang  papa Anselmo, sa dihang mibisita sa ilang balay. Nakahinumdom pa si Helen sa gisulti sa iyang papa ngadto kang Jimmy.

“Di ko buot nga maglisudlisod ang akong anak sa iresponsableng lalake nga bisyoso ug tapulan.” Ingon sa kandilang nahilis, pagkadungog ni Jimmy niini.

“Pasensya na lang kang papa, Jim,” niya pa sa celpon, “di sa nato siya samokon.”

“Hain may maayo, magtaban na lang ta?”

“Malooy ko ni papa, Jim, basin una naa’y mahitabo, masakiton ra ba siya’g kasingkasing.”

“Sige, magkita na lang ta sa atong tagboanan. Human unya sa atong panagkita, isaad kong mopahilayo na ning dapita,” dayong off sa celpon.

Sa dihang nagkita na sila, gigugol nila ang tibuok panahon sa pagtagbaw sa kalalim sa ilang gibating kahigwaos, ning ila karon nga katapusang panagkita.

Pipila ka bulan ang milabay,” mora man og mimabdos ka- kinsa man ang amahan niana?” sa amahan.

“Ayaw na problemaha,  papa,” migakos siya sa amahan nga mapahiyumon, “ang mahinungdanon nga ania ako, aron pagsunod sa imong kagustohan.”

Paglabay sa mga katuigan, ulitawo na ang anak ni Helen. Pinangga kaayo sa apohan.

Usa ka higayon niana, samtang nag-chat si Helen, diha diay sa likod ang papa niya.

“Helen, gimingaw na kaayo ko nimo, gusto kong magpakasal na kita.”

“Sige Helen, paaria siya, panahon na nga magmalipayon ka.”

Paglabay sa mga adlaw, didto na sila sa airport. Malipayon silang naghinangpanay.  Pag-abot nila sa balay, nakurat ang amahan, sa dihang gipaila kini nga amahan sa apo niya ug iyang pamanhonon, si Jimmy.

“Oo, panahon nang among saw-an ang matam-is nga bunga sa mga pagsulay, aron among tagamtamon sa kinabuhi, ang dugos sa kalipay.” (Katapusan)