Ang Luha ni Eva

Gula 2

Ingon sa nalingaw ang babaye nga duna na siya’y kaestorya mao nga wala na kini makahilak samtang nanglakaw sila si Miguel sa dalan Junquera paingon sa Colon. “Ako diay si Miguel, taga Barangay Tisa ko,” paila ni Miguel ngadto sa babaye.

“Uy pareho ra diay ta og barangay, taga sitio Riva Ridge ko. Eva ang akong ngalan Miguel,” milingi si Eva kang Miguel nga nabantayan sa ulitawo nga misud-ong kaniya gikan sa ulo ngadto sa tiil.

Misulod sila si Miguel ug Eva sa usa ka fast food store sa Colon ug miorder og ilang makaon. “Mag-lunch na lang ta Ev kay hapit na man ‘sab 12 o’clock,” giingnan ni Miguel si Eva.

Samtang giandam pa ang giorder nila nga pagkaon, gipahimudsan ni Miguel ang higayon pinaagi sa pakigsulti kang Eva. Gusto niya nga masayran nganong naghilak kini dihang misakay siya sa PUJ kaganina.

Sa iyang tan-aw kang Eva, ingon sa anam-anam na kining nabalikan sa iyang kamaya. “Gusto ko nga motabang nimo Ev kun duna kay problema. Mahimo ba nimo ako nga tug-anan nganong naghilak ka kaganina?” matud ni Miguel.

Wala dayon motubag si Eva sa pangutana ni Miguel. Gidali niini pagpunting ang iyang panan-aw lagbas sa bildo nga bungbong sa restaurant nga ilang gisudlan. Mora’g duna kini gihuna-huna ug daw naglisud unsaon pagtubag ang pangutana sa iyang higala.

“Please Ev, ayaw kataha kanako ug isipa nga dugay na kita nga managhigala,” ni Miguel nga mora’g naghinam-hinam na nga masayud nganong naghilak si Eva dihang misakay kini og PUJ.

“Gibuwagan nako ang akong boyfriend kay dili na ko makaantos sa iyang batasan nga kanunay lang ko niya pasakitan,” mubo nga tubag ni Eva. Miiknat ang kilay ni Miguel nga nakadungog sa gisaysay kaniya ni Eva.

Mihimo siya og laing pangutana kang Eva. “Giunsa ka man pagpaantos sa imong boyfriend Ev? Mora’g nakahimo og dakung sayop ang imong boyfriend kun tinuod nga iya ka nga gipaantos.”

Takulahaw lang nga nakita ni Miguel nga mitubod ang luha gikan sa mga mata ni Eva ug inanay kini nga midagayday sa iyang kaapingan. Wala tuyoa ni Miguel nga nagamit niya ang tuo niya nga kamot ug gipahiran ang luha nga midagayday sa aping ni Eva.

“Ayaw na kana paghuna-hunaa Ev. Tabangan ko ikaw nga maiban-ibanan ang imong problema. Sigi mangaon na ta,” matud ni Miguel.

Gitrapohan ni Miguel pinaagi sa tissue ang plato ug kutsara’g tinidor ni Eva. “Ayaw palabi Migz uy,” ni Eva pa nga nakapahiyom sa gipakitang pagtagad ni Miguel. -- Sumpayan