Gisuwerte si Loreto

Gula 6

Nangayo'g pasaylo si Loreto kang Claire nga wala siya makapugong sa kaugalingon ug nakapanguyab siya sa dalaga didto sa videokehan nga ilang gisudlan. Nasabot usab ni Claire nga matinud-anon kaayo si Loreto sa iyang pagpangayo'g pasaylo.

"Karon kita na lang dinhi sa sulod sa sakyanan Claire ug gusto unta nako nga pasabton ka mahitungod sa matuod ko nga pagbati nganha kanimo apan nabalaka ko nga basin og masuko ka kanako," aghop kaayo ang tono sa pagkasulti ni Loreto.

Wala makasabot si Claire sa iyang gibati nga mora siya'g nahimong amang. Lahi g'yud si Loreto sa ubang mga nanguyab kaniya nga sayon-sayon ra niya'ng balibaran. Tam-is usab kaayo nga pamation ang paggunit ni Loreto sa iyang kamot.

"Ambot uy, wala g'yud ko makasabot sa akong gibati karon Lor. Dili ko makabalibad kanimo," ni Claire pa. "Kun mao… gisugot na ko nimo Claire!!!" hilabihang lipaya ni Loreto bisan og wala pa gani makalitok si Claire nga gidawat niini ang iyang gugma.

Nagakus ni Loreto si Claire tungod sa naghingapin niya nga kalipay. Mora g'yud og gilumay ni Loreto si Claire kay wala gayud kini modumili dihang iyang gigakus. Daw nanghugot ang kaunoran ni Loreto nga mogakus sa dalaga.

"Salamat kaayo Claire nga wala nimo ako pakyasa, isaad nako kanimo nga panggaon ko ikaw hangtud sa hangtud," ni Loreto pa dayong patik og hawok sa aping sa dalaga. "Mangalit ka baya og panghawok uy," nagpahiyom si Claire nga milingi ni Loreto.

"Sori kaayo love ha nga wala g'yud ko makapugong sa akong gibati nimo. Pwede ba og mo-kiss ko sa imong lips," nananghid na gayud si Loreto sa maanyag niya nga hinigugma. "Walay problema uy para kiss lang total nineteen na akong pangedaron," matud ni Claire.

Mikilab lang ang mga gutlo og nagparayganay dayon ang bag-ong managhigugmaay. Bisan tuod og wala pa gani'y usa ka adlaw sa ilang panagkaila apan suod na kaayo silang duha ug karon misangpot na gayud sa paghigugmaay.

"Claire, ikaw maoy akong dad-on sa altar sa simbahan, ikaw maoy akong pakaslan," gipasaligan ni Loreto si Claire. "Tinuod ka? Bulatik lang na nimo uy," matud ni Claire.

"Mao kana ang tinuod Claire tungod kay ako maoy imong unang boyfriend nga naka-kiss ug naka-gakus kanimo.

Dili ba tinuod?" ni Loreto pa nga mipatik na usab og laing hawok sa dalaga.

Mipahiyom si Claire. "Wala ka masayop, ikaw pa ang unang lalaki nga nakahawok ug nakagakus kanako." Nagparayganay pa gayud silang duha.

Diha pa nabatyagi ni Loreto nga paraygon diay kaayo nga pagkababaye si Claire. - (Sumpayan)