Goodbye is not Forever

Gula 87

Hataas ang kutay sa panahon sa pagpangaliyupo ni Albert sa gugma ni Josheba. Sa kadugayan, misaad ang dalaga nga mohatag sa iyang  hukom atol sa iyang graduation. Mao kadto nga sa kasaulogan sa iyang kalamposan mitambong gyud si Albert. Bisan sa kadaghan sa mga bisita nga giatiman ni Josheba ug sa mga ginikanan niini, nakahigayon gyud si Albert pagsukot ngadto kang Josheba sa gisaad niini kaniya. Ug sangko sa langit ang iyang kalipay ug kahinangop dihang gibati niadtong higayona nga naangkon na gyud niya ang gugma sa dalaga.

“Daan pa lagi ko nga nalimot ka na gyud,” nagkanayon si Josheba nga sa tuno sa tingog dihay diyotay nga pagmahay ug kahiubos.

“S-sorry kaayo, Sheb, ha, ni Albert pa. Unsaon nga busy man gud kaayo ako sa trabaho. Hapit gani dili ko makapahuway tungod sa grabeng demand ang company karon. Estrikto kaayo ang nagdala kanamo karon. Dili na gani ko maka-online sa computer tungod kay lisod ko sa oras.” Ingon sa nakakita si Albert og malig-ong bungbong nga kaaliran sa iyang pangulipas...namakak siya. Ug midugang siya sa pag-ingon. “Maayo hinuon nga nanawag ka karon.”

Sa ilang pagpanagsultihanay, si Josheba didto sa pikas linya sa telepono, human mamulong si Albert, mitubag nga nagkanayon: “Ang tinuod, gusto kaayo ako nga manawag kanunay nimo. Apan nasayod ko nga busy ka sa imong work diha.” -- Sumpayan pa