Gisuwerte si Loreto

Gula 5

Salabtonon kaayo ang tinan-awan ni Loreto ngadto kang Claire. Nagkatinutokay silang duha apan wala makalahutay ang dalaga ug miduko kini tungod kay ingon siya sa mahilis nga gisigihan og tutok sa ulitawo.

“Nganong miduko ka man Claire, dili na ko makakita sa imong kaanyag,” matud ni Loreto nga daw mikomedya kaniya. Mitan-aw pagbalik si Claire kang Loreto. “Lain ka man gud kaayo og tinutokan nako kay mora ko og imong gihukasan.”

Mipahiyom si Loreto. “Ingon ana g’yud tingali kun ang lalaki kun mahigugma og babaye Claire.” Misamot nga mora’g wala mahimutang si Claire dihang nadungog niya ang gisulti ni Loreto kaniya. Nakasabut siya nga nagpadungog-dungog na ang iyang amigo nga may gusto kini kaniya.

“Ayaw kalain kanako Claire apan mao kana ang tinuod. Naigo ko sa pana ni kupido. Pagkakita pa lang nako kanimo sa unang higayon kaganinang buntag na-love at first sight dayon ko nimo,” matud ni Loreto dungan sa pagunit sa kamot sa dalaga.

Nahimong amang si Claire sa iyang nadungog. Makadaghan na siya nga gipanguyaban og mga lalaki apan sayon ra kaniya ang pagbalibad kanila. Sa iyang pagtimbang-timbang ning higayona, lahi ang sitwasyon ni Loreto.

“Please Claire, tuguti nga ako maoy unang makadama sa imong gugma aron isipon ko nga swerte kaayo nga maoy unang maka-kiss ug makagakus kanimo,” ni Loreto nga mihimo dayon og follow-up sa daw na-amang nga dalaga.

Mipahiyom si Claire ug mitutok kang Loreto. “Ngilngiga nimo mangamoral og babaye Lor uy, mora ka man og si Max Surban. Kaming mga taga probinsya Lor, dili basta-basta nga mosugot ra dayon og lalaki nga wala pa gani kaayo namo masinati. Hinoon nasabut nako nga buotan ka nga pagka-lalaki.”

Nakasabut si Loreto sa sinultihan sa dalaga nga ingon sa may gamay kahigayonan nga sugton siya ni Claire. “Kun may luna man gani ako sa imong kasing-kasing Claire, ayaw ako paantosa.”

Daw natuk-an na usab si Claire, wala makatingog. Ning higayuna gihikap ni Loreto ang suwang sa dalaga. “I love you Claire.” Kalit lang mitindog si Claire kay nakabantay nga ang ubang customer sa videokehan nagsige na og tutok kanila.

“Tana,” miuna paggawas si Claire sa videokehan kay gibayran pa ni Loreto ang ilang obligasyon. Didto na si Claire sa awto. Misakay si Loreto sa passenger seat. “Nasuko ka ba nako Claire nga nanguyab ko nimo?,” ni Loreto pa.

Milingo-lingo si Claire. “Wala ko masuko. Mitindog lang ko kay nauwaw ko nga gitutokan na ta sa mga tawo didto nga nakabantay nga nanguyab ka nako,” matud sa dalaga. (Sumpayan)