Sensilyong sukli para ni Sr. Sto. Niño

Samtang namik-ap og mga pasahero ang diyep nga akong gisakyan, giukban ko ang gamay’ng pitaka ug gibayad ang kataposang papel de banko nga pinilo ngadto sa konduktora, kinsa asawa sa drayber. Segun sa bulok nga nakita ko, P20 lang ang maong salapi. Nagpaabot kong suklian. Wala dayon ko hatagi. Hangtod may laing dalaga nga mitunol sab og kuwartang tibuok nga pinilo ug gipasa sa ubang pasahero, kinsa mao nay mitunol ngadto sa konduktora.

Nakita ko ang konduktora nga nagpunay’g kuot sa iyang bolsa ug miukab sa kaha nga mga sensilyo. Diay, manukli na!

Naigking ko dihang gitunolan ko niya’g P42 nga sensilyo. Kadawaton ko dili. Kay 20 ra baya tong akong gitunol. Unta, P12 ray mabalik nako. Apan dihang nangutana siya: “Kinsa ning P20?” Unya mitubag dayon tong dalaga nga naglingkod sa akong atbang nga iyaha, nakumo nako ang akong palad nga midawat og P42 nga pulos coins. Pero, diha gihapon ang kalibog -- nagsige’g ukay sa akong hunahuna:

“Ako ba gyud kaha tong P50, no? Di kaha to sa babaye?” Padayong sukna sa kahiladman ko samtang nagtutok sa usa ka tag P50 ug usa ka tag P20 nga pulos tibuok nga mao ray kuwartang gikimpitan sa konduktora.

Namatikdan kong gidawat sa batan-ong pasahera ang P12 nga sukli. Pero sa wala pa kini gisulod sa iyang bag, ingon sa miungot ang panan-aw sa babaye. Adunay gihunahuna ... nga tingale, nakapalibog sab kaniya. P20 ra ba gyud iyang kuwarta, o P50? Ug wa abtig dugay, gisulod ang sukli ngadto sa iyang bag. Unya, nagpunay’g pindot sa iyang selpon.

Sa akong bahin, wa ko mahimutang. Wa gani nako gisulod ang P42 sa akong bolsa. Nagduda ko kun ako ba gyud tong P50? Gisulayan ko’g subay ang mga kuwarta nga nasulod sa gamay kong pitaka sa nangaging mga adlaw. Nahinumdom ko nga duna kini pinilo nga tag P50 ug naa poy tag P20. Pero segun sa akong praktis, pulos tag P50 ang sagad ihalad-hulog ko sa collection bag matag misa. Nahurot na kini ug tibuok P20 na lang ang nahabilin. Sa ato pa, sa babaye gyod kadtong P50? Pero kun iyaha pa, nganong miangkon man siya nga iya tong P20? Pastilan, nakutaw gyod akong utok.

Hangtod nanaog na lang ko sa diyep ug naglakaw subay sa D. Jakosalem St. paingon sa Basilica del Sto. Niño, gikumkom lang gihapon nako ang P42 nga sensilyo. Wa man gud ako makaseguro kun ako ba gyud ni, mao nga nahadlok kong mogasto ini. Wala... wala ko maanad paggasto sa kuwarta nga dili akoa. Di ko gustong makasala! Busa, unsaon ko man ning kuwartaha? Ihatag sa makililimos, o isurender sa pulis? Naglibog gyud ko unsay angay’ng buhaton? Hangtod nakab-ot ra gayod nako ang usa ka talagsaong hukom.

Pag-offertory sa misa-nobena ni Sr. Sto. Niño nga akong gitambongan, gibuhian ko ang tanang gikumkom nga sensilyo didto sulod sa balaang sibot nga gidumol sa offertory collector tumong sa akong dughan. Ug nahuwasan ako. Naangkon ko sa hingpit ang kalinaw sa akong panghunahuna. (Kataposan)