Gisuwerte si Loreto - Gula 3

Samtang si Loreto nagsigi og handuraw sa maanyag nga panagway ni Claire, iyang nahuna-huna nga wala man diay niya mapangutana ang dalaga kun unsa ang iyang sakyanan.

Nahuna-huna ni Loreto nga kay milukat man si Claire og driver’s license, sigurado nga duna siya’y sakyanan. Giteksan niya si Claire ug nagpakisayud kun unsay sakyanan sa dalaga.

Wala madugay nakadawat og reply si Loreto ug iyang nasayran nga gipalitan diay si Claire og gamay’ng sakyanan sa iyang igsoon nga tua na sa abroad. “Dili pa kaayo ko bansay nga mo-drive Lor, patudlo unya ko nimo bi,” matud ni Claire sa text message.

Nakapahiyom si Loreto human niya mabasa ang text message ni Claire. Alang kang Loreto higayon na nga magkasuod sila pag-ayo si Claire ug maka-tsansing ‘sab siya sa dalaga atul nga iya kining tudloan.

Gireplayan dayon ni Loreto si Claire ug giingnan nga andam siya nga motudlo kaniya sa tukma nga pamaagi sa pagmaneho og sakyanan. Gawas pa, suheto usab si Loreto sa mga lagda sa balaud kay kaniadto nahimo man siya nga deputized agent sa LTO.

Pagkahapon, nakadawat og text message si Loreto gikan ni Claire. Nagpahibalo kini nga mopauli na siya sa Carmen. May nahuna-hunaan si Loreto human siya mahinumdom nga day-off niya pagka-ugma.

Giteksan niya si Claire. “Ihatud tika sa inyo Claire.” Mikubit ‘sab dayon si Claire. “Kanindot ana kun imong tinud-on. Pero layo kaayo ang Carmen uy,” ni Claire pa.

Gitawgan g’yud dayon ni Loreto si Claire. “Day off nako ugma Claire mao nga walay problema kun layo ang Carmen gikan dinhi sa Cebu City. Asa ta mag-abut Claire?”

Sa Colon sila nagkita si Loreto ug Claire. “Wow, naka-short pants ka na man lagi Claire,” ni Loreto pa nga daw nagpanilap nga nagpasiklap sa puti kaayo nga paa sa dalaga. “Wala man gud ko kahibalo nga magkuyog ba diay gihapon ta mao nga nag-short pants ra ko,” pasabot ni Claire.

Gipanid-an ni Claire ang mga lihok ni Loreto kun giunsa niini pagpadagan ang kotse. “Kamao na man ko mopadagan apan duna pa g’yuy kuwang,” matud sa dalaga. “Buyno, adto tika tudloi pag-drive sa imong kotse aron ka maanad,” ni Loreto.

 Pag-abot nila sa lungsod sa Carmen, gabii na. Nasuta ni Loreto nga arang-arangan diay usab pagkabutang sila si Claire. “Aw mao ni ang imong kotse?” ni Loreto pa nga nakakita sa pula nga awto nga giparking atubangan sa balay nila ni Claire.

May misugat kanila. “Mao ni si Loreto Ma, siya’y nagtabang nako ganina nga madali ang akong lisensya,” giingnan ni Claire ang iyang inahan. (Sumpayan)