Goodbye is not Forever Gula 81

Nahilom si Albert. Iyang gihinuktokan pag-ayo ang gipagawas nga katarongan sa iyang higala.

“Gawas pa,” misumpay sa pagpamulong si Eking, “nganong ipakuha man kuno niya ang bata kun tinuod man nga nagsabak siya?”

“Tungod kay nasayod siya, Brod,” ni Albert pa, “nga dili ako mangasawa kaniya. Nasayod siya sa gikasabotan namo ni Josheba tungod kay wala ako’y gililong kaniya.”

Kahilom. Karon si Eking na usab ang wala makatingog. Miduko kini nga ingon sa namalandong, daw gipalugdang sa hunahuna ang gisulti ni Albert.

“Brod, kun matinuod ang ania sa akong hunahuna dako na gyud ako og sala ngadto kang Josheba ug may tulobagon pa usab ako kang Debra.” Masulob-on nga namulong si Albert nga ingon sa nagbaguod sa kabalaka.

“Dili lang nako kalikayan nga maghunahuna, Brod, sa among kahimtang karon. Ingon man gud sa wala’y dereksiyon ang akong life karon,”  dugang pa ni Albert.

Ingon sa milabay ang Ginoo, matud pa nila. Tungod kay taudtaod ang paghabol sa kahilom sa duha ka managhigala. Si Eking nagduko samtang si Albert nagtungok usab nga mihun-ag sa panagway sa tuman nga kasub-anan.

“May gibug-aton tuod kining gisudlan mong problema, Brod,” nagkanayon si Eking human sa taudtaod nga paghinuktok. “Apan nasayod ako nga masulbad mo ra kini. Kun maantigo ka nga mosulod, maantigo usab ikaw nga molingkawas.” -- Sumpayan pa