Gasa sa Valentines

Gipaningot ang matag pitik sa mga gutlo sulod sa operating room. Paspas ang lihok sa naggwantis nga mga kamot nga nagtinabangay pagluwas sa kinabuhi nga gisigehan nag atang ni Kamatayan. Gamay na lang ang kulang sa gitagal nga oras, diyotay lang sipyat sa doktor ... kun dili madali ang angay’ng buhaton ngadto sa pasyenteng naglisod na sa pagginhawa, madisgrasya gyod kini.

Nanglabay ang kulba-hinam nga mga gutling. Bag-ong kinabuhi, o kamatayon? Kinsa ang modaog? Miginhawa’g lawom ang aircondition nga nakapanghupaw samtang nagsud-ong sa mananambal, kinsa nagpadayon pagdisdis sa dughan sa pasyente. May gitangtang --ang masakiton nga kasingkasing. Dunay gitaod-puli-ang himsog nga kasingkasing gikan sa tawo nga naluoy. Tayming pa gyod nga Valentine’s Day.

Nahibulong si Minerva pagbuka sa iyang mga mata. “Uy, hain ba ako?”

“Ania ka na sa imong kuwarto sa ospital, Min. Luwas ka na!” Matud pa sa tingog nga diha sa iyang duol. Giablihan pa niya’g dako iyang panan-aw. Ug nakita niya ang nag-alirong nga mga higala libot sa iyang higdaanan. Mibathay ang tam-is nga pahiyom sa iyang mga ngabil. Gipaliraw ang mga mata sa tagsatagsa nga nagbarog. May gipangita.

“Si Gil? Wa lagi. Hain diay?” Hinay’ng sukna, apan nakapatay-og sa tagsatagsa ka galamhan sa nakadungog. Best friend ni Minerva si Gil. Childhood playmate. From primary school to college, mag-uban sila kanunay. Daw managsuon. Diha lang sila magkalagyo pagtrabaho na ni Gil sa Amerika.

Mitaob ang makabungog nga kahilom. Walay usa sa mga higala ang nakaako sa pagtubag. Gipakgang ni Minerva ang kamingaw. “Kalain ni Gil. Ingon siya sa Facebook, moanhi siya. Wala diay?” Dinhay pagmahay sa pinulongan sa dalaga.

Unya may mitunol ni Minerva og usa ka sulat. Gidawat kini. Nalipay siya pagkasayod nga gikan diay ni Gil ang maong sulat. Dali niyang giablihan ug gibasa. Ug didto pa siya masayod nganong wa makaanhi si Gil uban ning grupo nga miduaw niya karon. Dili ... dili na niya makita si Gil. Dili naaa!!! Wala kapugngi ang pagpangligid sa mga luha sa pasyente, kinsa bag-o lang gi-heart transplant. Nasayran niya nga nahigugma diay kaniya sa hilom si Gil sukad pa niadtong haysikol pa sila -- niadtong panahon nga kaantigo na silang mobati unsay gugma? Ug gimatuod kini sa ulitawo atol niining adlaw sa managhigugmaay. Dili ...  dili na niya makita ang  tawo nga iya sab nga gihigugma. Apan mabati niya kanunay ang kalumo sa mga pinitik sa kasingkasing niini nga ania, gibilin kaniya.

“Pagka talagsaon sa imong gugma, Gil. Pagka mahal ning matang sa gasa nga imong gihatag kanako.” Tuaw ni Minerva nga mipaod sa nakun-ot nga papel tungod sa iyang dughan. (Kataposan)