Bidlisiw sa Kabuntagon

Gula 6

“Ayaw lang kaayo pagpakusog og padagan Mags kay basin og madisgrasya ta,” giingnan ni Tessie si Magno dihang iyang nabantayan nga kusog na kaayo ang dagan sa motor samtang nagtungas sila sa Barangay Busay.

Misamot nga daw mipilit na ang lawas ni Tessie sa buko-buko ni Magno kay migakus na pag-ayo ang dancer kaniya tungod sa kahadlok nga mabalibag siya  tungod sa kakusog nga pagdagan sa motor.

Tungas ug lugsong sa kabukiran ang motorsiklo nga ilang gisakyan paingon sa Sitio Kantipla sa Barangay Tabunan. Sa ilang unang paglugsong sa pagsaylo nila sa eskena paingon sa TOPS, daw miukob ang lawas ni Tessie sa buko-buko ni Magno.

Lalim kaayo ang gibati ni Magno nga nagdikit ang ilang lawas. “Wayes ka g’yud no, gipakusgan nimo pagpadagan aron mopilit ko sa imong lawas,” giingnan ni Tessie si Magno dungan sa pagluknit og hinay sa iyang kilid.

Nakapahiyom si Magno. “Ayaw kabalaka Magno, inig-abot nato sa rest house nimo makaparayeg ka lagi nako basta ayoha lang pagpadagan nga dili kita madisgrasya,” matud ni Tessie.

Tuod, mikalma si Magno sa pagpadagan. Wala danti’g dugay didto na sila sa Kantipla. Hapit makasinggit si Tessie sa kahadlok dihang gipasuot-suot ni Magno ang motorsiklo subay niadtong gagmay nga mga dalan-dalan nga alang ra sa mga tawo.

“Kalma lang ayaw paglihok kay sa unahan moagi ta sa dapit nga ang ubos lawom nga pangpang,” giingnan ni Magno ang dancer nga si Tessie. Daw nangurog ang kalawasan ni Tessie diha nga gisubay na nila ang dalan paingon sa labing peligroso nga agianan.

Pagsaylo nila sa maong dalan, maayo na ang agianan ug didto na sila sa rest house ni Magno. “Hala, kanindot man diay dinhi sa imong rest house Mags no?” matud ni Tessie samtang naglantaw sa layo kaayo nga kabukiran.

Gisugat sila sa bata-bata ni Magno. Gimandoan ni Magno ang duha niya ka bata-bata nga andaman sila og pagkaon. Nagpakuha si Magno og mga presko nga lainlaing prutas. “Adto usa ta sa rest house kay nag-andam pa sila og atong makaon. Nagpaasal ko og manok-bisaya Tess.”

Nasabot ni Magno nga nalingaw kaayo si Tessie sa ilang kahimtang. “Unya, sensiro ka ba sa imong giingon nga makaparayeg ko nimo karon?” giingnan ni Magno ang gwapa nga dancer. Nagtinutokay sila’ng duha ug takulahaw lang nga nagdikit ang masi’g nila ka mga lawas.

Nagkatawa si Tessie. “Dili ka pa gayud diay makamao kaayo. Gusto ka ba nga akong tudloan unsaon nga malipay ta’ng duha?” ni Tessie pa. Gisirad-an ni Tessie ang pultahan sa rest house ug sa iyang pagbalik nagpasabak dayon siya kang Magno. (Sumpayan)