Bidlisiw sa Kabuntagon

Gula 5

Gusto g’yud unta ni Ely nga i-check-out sa iyang higala nga si Magno ang iyang kapartner nga si Tessie. Apan naglisud si Magno pagsulti sigun sa gitudlo kaniya ni Ely.

Nakahuna-huna si Magno nga imbitahon ra niya si Tessie pagbisita sa iyang rest house nga nahimutang sa lapad niya nga kaumahan sa bukid sa Kantipla didto sa Barangay Tabunan.

“Malingaw ka didto Tess kay daghan kaayo ko og mga prutas nga abut sa akong kaumahan,” matud ni Magno agi ug pagkumbinsir niya kang Tessie nga mubisita sa iyang rest house sa bukid.

Tuod, wala mosipyat si Magno kay nagkisi-kisi si Tessie nga gusto g’yud muadto aron matilawan ang giingong daghang prutas nga abot sa uma ni Magno.

Miparayeg si Tessie kang Magno. “Kuhaa ko ugma sa mga alas nuebe sa buntag ha? Adto ta magkita sa Junquera Street atubangan sa opisina sa PROBE… katultol ka?” giingnan ni Tessie ang iyang kustomer.

Miyango-yango si Magno. Ingon sa paraygon na kaayo si Tessie ngadto ni Magno. Nakapanglingo-lingo hinoon si Ely kay natan-aw niya nga kuwang gihapon ang aksyon sa iyang higala.

Nanggawas sila si Ely ug Magno uban sa duha pa nila ka kauban nga nalingaw lang pagtan-aw sa mga pasundayag sa mga dancers sa stage.

“Naghinam-hinam ko bay Ely kay mouban kuno si Tessie adto sa amo sa bukid ugma sa buntag. Muadto kuno siya sa akong rest house sa bukid,” giingnan ni Magno ang iyang higala.

“Aw wala na bay, maisip nga hapit ka na modama,” matud ni Ely nga nagngisi. Dili matukib sa kalipay ang gibati ni Magno nga naghuna-huna sa panag-uban nila ni Tessie inigka-ugma.

Pagkaugma sa buntag… sayo kaayo nga nangandam si Magno. Gilimpyohan niya ang iyang motorsiklo nga maoy sakyan  nila ni Tessie paingon sa Kantipla.

Wala pa gani alas nuebe sa buntag, didto na si Magno naghuwat kang Tessie kilid sa Citi-Center sa Kamagayan. Wala danti og tunga sa oras nalantawan niya si Tessie nga migawas gikan sa usa ka gamay’ng agianan.

Dugay nga nakaila si Magno kay nagsul-ob og kawo si Tessie ug nag-short pants nga giparesan og jacket. “Ganina ka ra Mag?” gipikpik ni Tessie ang abaga ni Magno sa dayon niya’ng angkas sa motor.

“Tana,” giingnan niya si Magno. Misirit dayon si Magno pagpadagan sa motor. Misamot ang kahinam nga gibati ni Magno kay migakus sa iyang hawak si Tessie samtang nag-angkas sa motor.

Dunay mga higayon nga modapat sa iyang buko-buko ang duha ka bungtod sa dughan ni Tessie. (Sumpayan)