Maka-in-love siya

Dear Tita Salie,

Have a wonderful day. Just call me Geyola, I’m a girl from Consolacion, Cebu, duna koy crush nga tawgon lang nato siya og Mr. J.E.

Kini si Mr. J.E. duna nay uyab  matud sa akong mga kaila o higala. Kay wala pa man gyod ko kakita nga duna siya’y gika-loving-loving nga laing babaye. Matud nila taga Lapulapu ang uyab ni Mr. J.E. Mangita gyod og paagi ang akong mga friends nga ma-discourage ko sa akong crush. Apan bisan unsaon nila pagdaot niining  lalakiha padayon lang gihapon ko nga na-inlove kaniya.

Kusog man gud kaayo managad kini si Mr. J.E., bisan unsaon nako og deadma kaniya magpatagad gyod siya nako. Unya nindot pa gyod kaayo ang iyang attitude ug maayo kaayo siyang manamit, Tita Salie. Sa laktod nga pagkasulti maka-in-love gyod siya.

Usahay ako siyang mabantayan nga magpaibog gyod siya kanako. Morag gusto gyod niya nga pansinon nako. Unsa may akong buhaton, Tita Salie, aron dili nako maibog kang Mr. J.E? Kay matud nila duna na siya’y uyab. Pero nganong mora og magpaibog pa man siya kanako?

Palihug pasabta ko ug sultihi ko sa angay nakong buhaton. Thank you, Tita, and more power. -- Ms. Geyola

* * *

Hello, Ms. Geyola,

Kun muingon ka nga gidaut sa imong mga kaila ang imong crush, unsa man kahay makuha sa imong mga kaila nga ila man kanang buhaton ngadto sa imong crush? Unsa may ilang mapaabot kun ma-discourage ka sa maong lalaki? Mao kini ang hunahunaa usa nimo sila pasanginlan nga gidaut niini ang imong crush kay tingali diay kun ila ka lang nga giprotektahan aron dili ka masakitan. Kay usahay gud, o kasagaran nga mahitabo kun ma-inlove kita sa usa ka tawo dili na nato makita ang bad side niini. Tungod kay dili usab kita gusto nga mutan-aw ug dili kita gusto nga masayod sa bati nga side sa tawo nga atong gimahal. Maoy gusto natong makita ug mahibaw-an ang tanan nga nindot diha kaniya tungod kay na-inlove man kita. That is why duna tay panultihon nga nag-ingon “Love is blind.”

Angay nimong hatagan og gibug-aton ang mga sulti-sulti sa imong mga kaila. Busa ayaw una patuyang sa imong gibati, usisaha pag-una ang pagkatawo niining tawo nga imong gimahal kun wala ba siya’y kabilinggan. Ayaw pagsalig pag-ayo sa imong dughan kay expert lamang siya sa pagmahal bisan ang tawo dili angayan higugmaon.

Gamita una ang imong panghunahuna aron ilhon kining maong tawo usa siya nimo higugmaon. Mao kini ang buot ipasabot sa mga warning sa imong mga kaila. -- Tita Salie