Tingog sa katawhan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Mga pasalamat sa tanang Banat News readers

Dili tanang tampo mapublikar. May pipila niini mabasura ug aduna poy mauli ngadto sa nagpadala kang kansang kontribusyon nga gipaagi sa koreo gipatabanan og self-stamped address envelop. Bisan ang tadhang magsusulat di sa tanang higayon ikamantala ang iyang mga sinulat. Anaa poy mga tampo niya nga mahibalik sa iyang talad. Nga sa ato pa, wala’y gipili ang editor. Bag-o ka man o daan nga kontribyutor, basta makaabot lang sa standard ang materyal nga imong gibaligya sa publisher, paliton nila kini. Pero’g dili, ila sab kining iredyik. Unahon nila ang pagmantala. Wahi na ang bayad.

Sa nagtipun-og nga mga tampo, diin lapas na sa ulo sa editor ang gihabogon kanang molingkod na siya sa lamesa, suwerte kaayo ang usa ka bag-ong magtatampo kun mapatikan siya’g kaduha o katulo sa usa ka bulan. Sa ato pa nakapasar siya sa panilaw sa editor. Ang pangutana mao: May mibasa ba sa imong sinulat?

Usa ka buntag samtang naglakaw ko sa  sidewalk subay sa Osmeña Boulevard, naagian ko ang mga tawo nga mibasa’g Banat News. Ambot kun sulagma ba, nasigpatan kong maoy ilang gibasa ang akong gisulat nga sugilanon nga maoy migula niadtong adlawa. Puwerte nakong lipaya, uy!

Sa trabahoan, akong mga kauban kun magkasugat mi, modayog ingon: “Boss Jav, nakabasa mi sa imong mga sinulat.” Laing kalipay ang akong nabati.

Nalingaw ko sa ilang tagsatagsa nga gihimo ug gipadayag. At least, wala mausik ang unod sa akong mga sinulat nga giladlad sa mga panid sa Banat News. Timaan kini sa kalamposan. Tingog sa mga fans nga makadasig.

Mga  Banat News readers, ilabi na niadtong nag-subscribe ug wala’y palta sa pagpalit og hulad kada-adlaw, kaninyong tanan ako nagpasalamat. Ug usab ngadto sa Ginoo, kinsa maoy tuburan niining matang sa kalingawan nga atong nadawat. Viva, Sto. Niño, Pit Senyor! Javier Y. Tapulado